DILI, 18 setembru 2023 (TATOLI) – Programa Bolsa Estudu husi Fundu Dezenvolvimentu Kapitál Umanu (FDCH, sigla portugés) benefisia ona timoroan hamutuk 10.355 durante tinan 12, entre 2011 no 2023.
Tuir dadus FDCH, bolseiru liu rihun 4 maka akaba ona sira-nian estudu no restante sei kontinua hela sira-nian prosesu aprendizajen iha rai-laran no li’ur.
“Ita hein katak bainhira sira finaliza ona estudu bele mai fali Timór hodi kontinua hala’o sira-nian misaun iha Programa Estájiu Profisionál, nune’e sira bele hetan fatin hodi serbisu iha instituisaun sira”, Diretór-Ezekutivu FDCH, Cristovão dos Reis, hatete iha Fatuhada, ohin.
Husi totál númeru benefisiáriu bolsa estudu 10.355 (feto 5.400 no mane 4.955) – na’in-271 maka FDCH la kontinua fó apoiu tanba sira-nian komportamentu ka valór ne’ebé maka universidade sira haruka mai la korresponde ho akordu ne’ebé maka sira asina ona. Iha mós estudante na’in-hitu maka la konsege finaliza sira-nian estudu tanba hetan asidente no lakon vida.
“Ein prinsípiu kuandu sira termina ona estudu iha rai-li’ur ka rai-laran, ita sei loke oportunidade ba sira hodi tuir Programa Estájiu Profisionál durante fulan neen iha liña ministeriál ka instituisaun públika ka privada sira”, dehan.
Durante estajiáriu, bolseiru sira ne’e maka hatudu sira-nia kapasidade no koñesimentu bazeia ba avaliasaun instituisaun bele rekruta hodi fó servisu ba sira.
Ezemplu ida mak Sérgio de Andrade, estudante Universidade Nasionál Timor Lorosa’e (UNTL) ne’ebé sai benefisiáriu ba Programa Bolsa Estudu banhira akaba nia lisensiatura iha 2022 no halo estájiu iha Universidade Katólika Timorense (UCT, sigla portugés) durante fulan neen, entre setembru 2022 no fevereiru 2023, nia hetan kedan kontratu husi universidade iha marsu.
Graduandu husi Fakuldade Agrikultura ne’e salienta katak durante estájiu, kada fulan nia simu subsídiu $150 husi FDCH ba transporte nian.
“Ha’u-nian estájiu ne’e remata iha fevereiru depois ha’u hetan kedan kontratu husi UCT. Agora ha’u servisu fulan neen ona”, nia relata.
Rekorde katak iha 2023, FDCH aloka millaun $17,7 ba implementasaun atividade 38 ne’ebé distribui ba programa haat: formasaun profisionál, formasaun téknika, bolsa estudu no governasaun di’ak no jestaun institusionál.
Notísia relevante: FDCH prevee millaun $17 ba programa haat iha tinan 2023
Jornalista: Tomé Amado
Editora: Maria Auxiliadora
