BONONARO, 18 setembru 2023 (TATOLI) – Autoridade Munisipál Bobonaro no Programa Nasaun Unida ba Dezenvolvimentu (UNDP, sigla ingles) no lia-na’in sira, kinta ne’e halo serimónia kulturál iha bee-matan antes kompañia manán-na’in instala sistema bomba enérjia solár hodi fornese bee-moos ba uma-kain 200 iha suku Lour, postu administrativu Bobonaro, munisípiu Bobonaro.
Bomba solár fasparte hosi sistema bombeamentu bee solár. Ferramenta ne’e alimentada hosi enérjia solár, ne’ebé kapta hosi painél fotovoltaika, nune’e ho ninia funsionamentu bomba bee.
Projetu refere nu’udar projetu pilotu UNDP nian, ne’ebé implementa iha munisípiu tolu hanesan; Manatuto, Ataúro no Bobonaro kobre suku tolu hanesan; Leo-hitu, postu administrativu Balibó, suku ida iha postu administrativu Lolotoe no suku Lour.
“Agradese ba UNDP bele iha ona programa di’ak, atu dada bee ba ha’u-nia komunidade ida suku Lour ne’e, dezde uluk kedas sira suspira hela ba bee-moos, maibé ohin loron mehi ne’e bele realiza,” Prezidente Autoridade Munisípiu Bobonaro, Ernesto de Oliveira Barreto, informa ba Jornalista sira iha Lour.
Nia husu ba komunidade, joven no veteranu sira atu koopera ho parseiru UNDP no kompañia implementadór nune’e projetu refere bele finaliza lalais ho susesu.
“Ita-nia parseiru sira hateten, ne’e hanesan projetu pilotu, entaun koko, susesu ka la susesu, sé la susesu signifika ke labele kontinua tán, ne’e duni ha’u husu imi lolo-liman ba malu, servisu hamutuk fó susesu, atu projetu ne’e bele ba mós suku sira seluk iha munisípiu Bobonaro,” nia apela.
xefe suku Lour, Miguel Gomes Lopes, espera projetu refere sei lansa iha tempu badak.
Nia dehan, sistema bomba enérjia solár ne’e sei fornese bee ba abitante aldeia tolu hanesan; Helikei, Olo-Olo no Tasgolo.
“Aldeia Helikei ho Tas-Golo daudaun ne’e bee-moos la’o hela, maibé debitu bee mak lato’o atu fornese ba komunidade sira, tanba ho projetu ida-ne’e ita bele garante katak bele haforsa liután aldeia rua ne’ebé menus bee-moos no aldeia Tasgolo ne’ebé tempu naruk tebes bee laiha de’it,” nia katak.
Suku Lour iha aldeia haat mak hanesan; Tazgolo, Helikei, Olo-Olo no aldeia Galitas ho totál populasaun 1,440, komposta hosi feto 725 no mane 725, mai hosi uma-kain 200 ho xefe família 315.
Notísia relevante: SEPS apoia materiál rekuperasaun ba vítima dezastre naturál iha Lour
Jornalista : Sérgio da Cruz
Editór : Evaristo Soares Martins
