DILI, 19 setembru 2023 (TATOLI)–Governu liuhosi reuniaun Konsellu Ministru, iha tersa ne’e, aprova projetu proposta lei, ne’ebé aprezenta hosi Ministru Administrasaun Estatál, Tomas do Rosário Cabral, kona-ba alterasaun dahaat ba lei númeru 11/2009, loron 07 outubru, ne’ebé aprova Divizaun Administrativa Territóriu.
“Tuir saida maka prevee ona iha programa IX Governu Konstitusionál, alterasaun ne’e ho atensaun atu halakon munisípiu Ataúru no kria fali divizaun administrativa eskalaun dahuluk foun ida, ne’ebé hanaran ‘Atauru’, hanesan ne’ebé prevee ona iha artigu 5 Konstituisaun Repúblika nian hodi fó hatene katak Atauru goza tratamentu administrativu no ekonómiku espesiál,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : Governu sei muda estatutu munisípiu Ataúro sai rejiaun
Aleinde ne’e, halo mós eliminasaun referénsia ba ‘suku’ hanesan parte hosi divizaun administrativa tanba suku mak entidade ne’ebé liga ba administraun autónoma no la’ós hanesan parte hosi divizaun administrativa territóriu.
Ho alterasaun ida-ne’e, territóriu Repúblika Demokrátika Timor-Leste kompostu hosi divizaun administrativa eskalaun dahuluk hanesan Ataúro, Aileu, Ainaru, Baucau, munisípiu Bobonaro, Covalima, Dili, Ermera, Lautém, Liquiçá, Manatuto, Manufahi, Viqueque no Rejiaun Administrativa Espesiál Oé-cusse Ambenu (RAEOA).
Jornalista : Antónia Gusmão
Editora : Julia Chatarina
