OÉ-CUSSE, 19 setembru 2023 (TATOLI) – Komandu Polísia Nasioál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), segunda ne’e hala’o sensibilizasaun kona-bá papél no kna’ar polísia nian hodi hasa’e koñesimentu komunidade sira iha suku Bene-Ufe, sub-rejiaun Nítibe.
Notísia relevante: PNTL rejista kazu violénsia doméstika aas iha Oé-Cusse
Iha komunikadu imprensa ne’ebé Agência Tatoli asesu, durante atividade sensibilizasaun ne’e, lidera hosi Segundu Komandante Interinu Rejiaun Oé-Cusse Ambeno, Inspetór Xefe, Angelo Quelo.
Akompaña hosi Komandante Esquadra sub-rejiaun Nítibe, Xefe Sesaun Tánzitu no Investigasaun Kriminál, ho sub-sesaun VPU, halo aprezentasaun hodi fahe informasaun kona-bá funsaun no kna’ar kada sesaun, atu nune’e komunidade sira bele iha koñesimentu kona-bá papél no kna’ar polísia nian.
“Komandu Polísia Rejiaun Oé-Cusse Ambeno hakbesik aan ba komunidade sira-nia leet, liuhosi programa polisiamentu komunitária, hodi halo sensibilizasaun kona-bá papél no kna’ar polísia nian,” refere nota imprensa ne’e.
Iha sesaun aprezentasaun ne’e, primeiru kona-bá bnatureza krime nian hanesan; krime públiku no semí-públiku, estatístika krime sira, hahú hosi janeiru to’o agostu 2023 no fó solusaun hodi prevene problema sira-ne’e.
Sesaun daruak, aprezenta kona-bá, lei kontra violénsia doméstika ne’ebé prevista bazea 7/7/2010, sesaun datolu kona-bá kódigu estrada númeru 6/2003 no diploma menistériál númeru 5 /2010 kona-bá transporte públiku liuliu tula pasajeiru.
Notísia relevante: PNTL OÉ-CUSSE Rejista Kazu Krime 60
Segundu Komandante PNTL Rejiaun Oé-Cusse, Inspetór Xefe, Angelo Quelo, fó hanoin ba autoridade lokál iha sub-rejiaun Nítibe atu servisu hamutuk membru KPK kria amizade iha suku no aldeia, servisu hamutuk atu prevene krime iha komunidade nia leet, nune’e kontribui ba pás no estabilidade iha suku rejiaun, liuliu suku Bene-Ufe, sub-rejiaun Nítibe.
Iha oportunidade ne’e, Xefe Suku Bene-Ufe, Marcos Coel Meni Sila, agradese tanba liuhosi sensibilizasaun ne’e bele hasa’e koñesimentu komunidade nian iha área rurál.
“Lori komunidade sira-nia naran agradese no simu ho laran kontente, ohin autoridade seguransa mai fahe informasaun kona-bá programa refere, importante tebes ba komunidade sira, iha Bene-Ufe, tanba hela besik iha liña fronteira, no ami iha área rurál barak mak sidauk hatene kona-bá papél no kna’ar polísia nian,” autoridade lokál ne’e orgullu.
Notísia relevante: PNTL Oé-Cusse rejista kazu asalta malu ida iha Pante Makasar
Jornalista : Abílio Elo Nini
Editór : Evaristo Soares Martins
