VIQUEQUE, 20 setembru 2023 (TATOLI)–Organizasaun Naun Governamentál (ONG) Belun halo monitorizasaun no rejista aktu insidente krime hamutuk 40 iha postu administrativu Viqueque Vila, Ossu no Uatulari, iha munisípiu Viqueque, hahú hosi fulan-jullu to’o setembru 2023.
“Bazeia ba ami-nia programa prevensaun konflitu no promove dame nian, tanba ne’e ami aprezenta filafali rezultadu ba autoridade sira kona-ba rezultadu monitorizasaun dadus insidente liga ho violénsia ne’ebé maka ami detekta hamutuk parseiru Polísia Viqueque no Autoridade lokál sira,” Diretór Belun, Luís Ximenes, informa hafoin aprezenta rezultadu monitorizasaun iha sede suku Uma-Ki’ik, kuarta ne’e.
Belun rekolla dadus bazeia ba prosesu verifikasaun ba kazu violénsia doméstika no violénsia bazeia ba jéneiru.
“Ami rejista kazu hirak ne’e iha postu tolu, ne’ebé entre dadus ne’e númeru a’as liu mak iha postu Viqueque Vila. Ho ida-ne’e ami halo diskusaun ho Autoridade komunitária hodi tau hanoin hamutuk ba prevensaun insidente liuhosi meiu mediasaun. Belun sei kontinua halo sosializasaun hodi hakbiit koñesimentu komunidade atu halo prevensaun,” nia akresenta.
Notísia relevante : Ministériu Interiór-BELUN estabelese Rede Nasionál Mediasaun Timor-Leste
Insidente 40 kompostu hosi iha postu Viqueque Vila hamutuk kazu 19, Ossu sia no Uatulari 12.
Belun hetan apoia hosi Centro Nacional Chega!, Institutu Públiku (CNC, I.P) halo atividade monitorizasaun, ba kontribuisaun relatóriu Chega! hakbesik ba komunidade promove dame no konflitu violénsia.
Iha fatin hanesan, Administradór postu Viqueque Vila, Duarte Brandão Soares, husu abitante postu atu muda mentalidade hodi kontribui ba pás no estabilidade atu redús kazu violénsia rejistastadu.
“Iha motorizasaun ita Viqueque Vila rejista kazu hamutuk 19. Tanba ne’e ita tenke esforsu hodi bele redús aktu krime sira-ne’e iha ita-nia suku no aldeia sira. Ha’u hanoin agora ba oin ita tenke prevene krime sira ne’ebé rejista. Ho ida-ne’e ha’u husu ba abitante sira iha postu atu halakon ona hanoin no hahalok krime sira,” nia hato’o.
Atividade aprezenta rezultadu monitorizasaun insidente hetan partisipasaun hosi Autoridade Komunitária no Konsellu suku, Polísia Nasionál Timor-Leste (PNTL) Eskuadra Viqueque Vila inklui komunidade lokál.
Jornalista : Vitorino Lopes da Costa
Editora : Julia Chatarina
