OÉ-CUSSE, 21 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e inaugura edifísiu administrasaun sub-rejiaun Nítibe inklui moru protesaun metru 641.
Edifísiu administrasaun ne’e Autoridade RAEOA konstrui iha bairru Baoknana, aldeia Citrana, suku Bene-Ufe, hodi fó atendimentu públiku ba komunidade sira suku lima iha sub-rejiaun Nítibe, ne’ebé mai hosi suku Ban-Afi, Usitaku, Lela-Ufe, Bene-Ufe no suku Suni-Ufe.
Notísia relevante: Autoridade RAEOA nomea Teodoro Sila nu’udar jestór foun iha Nítibe
Arsénio Paixão Bano, konsidera edifísiu administrasaun foun ne’e iha futuru sei sai atendimentu públiku di’ak liután hodi fó atendimentu ba suku lima iha sub-rejiaun Nítibe hodi kontribui ba dezenvolvimentu.
“Ne’e signifika Oé-Cusse kontinua la’o ba oin, tan ne’e mak ita halo postu administrativu ida-ne’e, atu komesa ona estuda haree, saida mak ita tenke halo servisu funsiona iha sub-rejionál sira atubele haree servisu dezenvolvimentu ne’e ba oin, tán ne’e ha’u husu komunidade hamutuk ho xefe suku sira, ita tenke servisu hamutuk atu rai ne’e dezenvolvimentu kontinua la’o lais,” Arsénio Paixão Bano, ko’alia iha serimónia inaugurasaun.
Ezekutivu ne’e agradese ba kompañia Terra Santa, hamutuk ho tékniku no traballadór sira, tanba halo ona obra edifísiu ida di’ak no kualidade, tan ne’e komunidade sira iha pertense sub-rejiaun tau matan hodi uza fasilidade Estadu ne’e ho di’ak no serbí ba públiku tomak nia nesesidade.
Notísia relevante: RAEOA aloka rihun $57-resin konstrui merkadu tradisionál Baoknana
Diretór Obra Públika Candido dos Reis Amaral, informa, projetu ba edifísiu administrasaun Nítibe, polítika Autoridade RAEOA nian liuhosi Sekretáriu Rejionál Administrasaun, hodi servisu hamutuk parte tékniku sira iha Diresaun Rejionál Infraestrutura, hahú prosesu inísiu to’o finalizasaun.
“Servisu ne’e puru, tékniku sira-ne’ebé servisu mesak Oé-Cusse oan ho orientasaun mai hosi Prezidente Autoridade RAEOA no Sekretáriu Rejionál Asuntu Administrasaun, tan ne’e ohin loron ita hotu sai sasin hodi entrega servisu ne’e ba iha jestór postu administrasaun Nítibe,” nia informa.
Jestór sub-rejiaun Nítibe, Teodoro Sila, agradese ba Autoridade RAEOA, tanba konstrui ona planu investimentu públiku ba fasilita atendimentu ba komunidade suku lima iha sub-rejiaun Nítibe.
“Ami hato’o obrigadu tanba durante tinan barak ona ita laiha edifísiu foun, edifísiu antigu mak uza hela hahú kedas iha tempu Indonézia to’o ukun an kuaze tinan 23 ona, ida-ne’e ami orgullu tanba ita bele hetan fatin ida-ne’ebé maka dignu, di’ak atu hala’o atendimentu públiku, hodi bele ajuda ita-nia komunidade sira liu-liu suku lima mak destakadu iha Nítibe,” nia orgullu.
Entretantu, edifísiu administrasaun inklui moru protesaun ne’e ezekuta hosi kompañia Terra Santa Unipesoál Lda, ho númeru kontratu 65/2022/PA/RAEOA-ZEESM, ho nia valór $235,338.49, orsamentu ne’e Autoridade RAEOA aloka hosi Orsamentu Jerál Estadu (OJE) 2022 nia ho durasaun servisu fulan haat.
Notísia relevante: Autoridade RAEOA prevee millaun $23 konstrui estrada hosi Pante Makasar to’o Nítibe
Jornalista: Abílio Elo Nini
Editór: Evaristo Soares Martins
