DILI, 21 setembru 2023 (TATOLI) – Diretór Servisu Edukasaun Munisípiu Dili, Carlito da Silva, apresia atividade to’os eskolár ne’ebé Eskola São Pedro implementa ba estudante 190-resin iha Dom Bosco, Comoro.
Liuhusi Programa Dezenvolvimentu Abilidade Edukasaun ba sékulu XXI ne’ebé São Pedro realiza ne’e sei tulun estudante sira atu hasa’e sira-nian abilidade no prepara sira iha futuru.
“Projetu pilotu kona-ba aprendizajen bazeada ba projetu iha to’os kímika ne’ebé maka Eskola São Pedro organiza ne’e di’ak tebes maske foin hahú ho matéria ida relasiona ho kímika nian, maibé sira halo ona buat ida furak hodi motiva estudante sira atu buka rasik hodi aprende”, dirijente hatete iha salaun Dom Bosco, Comoro, ohin
Nia dehan Eskola São Pedro hala’o nia misaun ida ho loloos no responsabilidade oinsá atu prepara estudante sira sai duni futuru nasaun ne’e ho loloos. Tanba ne’e, nia sujere ba eskola labele para de’it ho dixiplina kímika no kontinua mós ho fízika no biologia, nune’e bele hasa’e abilidade estudante sira-nian.
Edukasaun Dili sei halo esforsu atu hadi’a maneira ruma iha eskola públika sira, nune’e bele hetan mós atividade sientífika hodi hasa’e kualidade no abilidade no garante dezenvolvimentu ba estudante sira.
“Tanba daudaun ne’e Eskola São Pedro sai ona motivadora ida no sei loke odamatan ba eskola públika sira atu hadi’a nia sistema”, afirma.
Resposavel ne’e iha ona hanoin atu diskute asuntu ne’e hodi bele kria ona maneira no sistema ida di’ak ba estudante sira iha eskola públika hodi hadi’a sira-nian futuru.
Diretór Eskola São Pedro, Padre Matias Pinto, realsa katak atu hasae abilidade no kapasidade estudante sira maka eskola sei kria tan atividade barak hodi bele ajuda sira atu komprende ho didi’ak dixiplina sira ne’e.
“Atividade to’os eskolár ne’e hanesan projetu dahuluk. Ita sei kria tan atividade ba estudante sira, liuliu iha matéria sira ne’ebé maka sei tulun estudante atu sai ema ne’ebé iha kualidade”, promete.
Programa ida ne’e nu’udar pilotu ida iha área siénsia integrada nian iha kurríkulu désimu primeiru anu iha dixiplina kímika nian.
Notísia relevante: Estudante São Pedro aprezenta rezultadu peskiza no rekomenda atu konsumu bayam
Jornalista: Tomé Amado
Editora: Maria Auxiliadora
