PN ezije Governu halo intervensaun ba folin foos sa’e iha merkadu

DILI, 21 setembru (TATOLI)—Prezidente Parlamentu Nasionál, Maria Fernanda Lay, husu Governu atu halo intervensaun lalais ba folin foos kontinua sa’e iha merkadu ne’ebé afeta ba povu kbiit laek sira-nia moris.
Notísia Relevante: Governu planeia ona fahe foos ba populasaun iha área rurál
“Klaru, ida-ne’e Governu hatene nia papel. Folin foos ne’e problema Governu nian. Ami hein katak foos bele karun tanba foos hosi rai-li’ur mak mai. Para aleinde taxa uluk sa’e, ita iha problema tanba dezastre naturál iha rai seluk ne’ebé haruka foos ita sosa ba. Maibé iha situasaun sira-ne’e, Governu halo intervensaun iha merkadu, sira mós iha estoke ai-han para hodi bele interven, nune’e bele hatun presu lai,” nia hateten ba Agência TATOLI iha uma fukun PN, kinta ne’e.
Lídér segundu órgaun soberania daruak ne’e preokupa ho folin foos ne’ebé kontinua sa’e iha merkadu, tanba afeta ba povu kiik sira,-nia moris, nune’e presiza iha intervensaun lalais hosi Governu.
“Problema Governu nian, ami krítika tanba populasaun husu para hatun presu foos. Maibé atu hatun hanoin tenke iha negosiasaun hosi Governu ho importadór rasik,” nia hateten.
Xefe bankada CNRT, Deputadu Duarte Nunes, hein Governu halo intervensaun lalais, tanba se foos sosa hosi nasaun orijen kedas mak presu sa’e mai to’o iha Timor-Leste, atu hatun fali presu ne’e Governu presiza iha medida ruma atu responde.
“Bele halo intervensaun karik ita-nia estoke iha, agora kontribuisaun ida mak ita hatun tiha taxa impostu ne’e,mais la sufisiente tanba iha nia hun mak aumenta presu, ne’e realidade,” nia dehan.
Notísia Relevante: CLN sei importa tan foos tonelada 4.000 resin hosi nasaun rua
Jornalista : Nelson de Sousa
Editór : Cancio Ximenes

