BOBONARO, 21 setembru 2023 (TATOLI) – Xefe suku Oeleu, postu Administrativu Bobonaro, munisípiu Bobonaro, Januário Meta-Tae Bragança no Xefe suku Lourba, Lino de Jesus, preokupa implementasaun projetu hosi Programa Nasionál Dezenvolvimentu Suku (PNDS) ne’ebé durante ne’e kuaze la’o atraza.
Xefe suku Oeleu, informa, progresu Fíziku implementasaun Uma Naroman ba Povu faze daruak tinan 2022 atinje ona 75%, maibé durante ne’e servisu la la’o ho efetivu no menus kontrolu hosi ekipa tékniku postu no suku sira.
“Loloos ne’e 100% ona, maibé la hatene ekipa postu ne’e servisu mak ne’e ka lae, osan mak laiha ona ka oinsá, agora hein de’it kalen atu sa’e ona, maibé sasán ida mós laiha, ita husu telefone mós nunka responde,” xefe suku Januário levanta kestaun ne’e liuhosi diálogu ne’ebé organiza hosi Prezidente Autoridade Munisípiu Bobonaro, kuarta ne’e
Alende UNP, projetu reablitasaun sistema bee-moos ne’ebé implementa iha tinan 2022 mós to’o agora paradu.
“Ha’u husu Diretór PNDS atu klarifika razaun saida mak projetu sira ne’e la la’o,” Xefe suku Oe-leu katak.
Xefe suku Lourba, Lino de Jesus, hateten progresu fíziku UNP faze daruak unidade sia atinje ona 100% iha fulan agustu liubá, maibé to’o agora governu seidauk entrega ba benifisiáriu atu hela.
“Ha’u la hatene uma ne’e 150% mak entrega ka 100% mak entrega, tanba ita-nia povu ne’e ita taka odamatan, ninia oan sai eskola tara-aan iha xeve ne’e tohar hotu, sira mai fali xefe suku ami-nia xave ne’e aat tiha, depois odamatan ne’e taka kleur ona, maibé to’o agora sasán uma laran nia oin ita la hetan,” Lino tenik.
Ba Preokupasaun ne’e, Diretór PNDS Munisípiu Bobonaro, Paulino Viegas Tilman, rekoñese servisu la efetivu tanba dadaun ne’e PNDS hasoru hela problema rekursu umanu limitadu tanba foin lalais ne’e governu hakotu kontratu ba funsionáriu kazuál na’in-30.
“Problema ne’e difikulta tebes atu fasilita ita-boot sira hodi aselera projetu sira, maibé ita-boot nia ne’e atinje ona 75%, pelumenus hatudu netik pro-ativu hodi bele garante projetu ne’e finaliza tuir nia tempu,” Diretor Paulino esplika.
Tuir dadus tinan 2022 munisípiu Bobonaro hetan UNP unidade 459, hosi númeru ne’e uma sia iha suku Mali-Ubu mak progresu fíziku sei zero.
Enkuantu tinan ne’e PNDS implementa projetu 1,559 iha 50 postu administrativu neen.
Notísia relevante: PNDS Bobonaro menus rekursu umanu kontrola projetu
Jornalista: Sérgio da Cruz
Editór: Evaristo Soares Martins
