Administradór Covalima seidauk simu relotóriu implementasaun PMOPA
COVALIMA, 22 setembru 2023 (TATOLI)–Administradór munisípiu Covalima, Francisco de Andrade, seidauk simu relatóriu implementasaun programa Mão de Obra Postu Administrativu (PMOPA) iha Munisípiu Covalima.
Notísia Relevante: Governu husu autoridade Covalima relata progresu PMOPA no PNDS
“Ha’u seidauk simu relatóriu implementasaun programa Mão de Obra Postu Administrativu (PMOPA) servisu ne’ebé atu fó ba komunidade oinsá povu bele hetan netik osan atu sustenta ekonómia família,” Autoridade Covalima hateten ba jornalista sira, iha nia kna’ar fatin Sukaer Laran, sesta ne’e.
Implementasaun PMOPA ne’e jere direta hosi administradór postu administrativu sira, tuir matadalan bandu atu halo konstrusaun infraestrutura maibé matadalan implementasaun PMOPA fó prióridade ba programa halo reflorestasaun, limepeza jerál, hadi’a estrada no seluk tan.
Tanba ne’e, nia hateten, iha implementasaun PMOPA ne’e, nia parte sei haree relatóriu bainhira iha implementasaun mosu irregularidade iha parte ne’ebé.
“Iha implementasaun mosu irregularidade ha’u seidauk hetan maibé ita sei haree iha relatóriu mosu irregularidade iha parte ne’ebé, tanba implementasaun programa PMOPA klaru fó benefísiu ba komunidade ne’ebé la hetan osan iha sira-nia família,” nia hateten.
Implementasaun PMOPA kada postu administrativu aloka orsamentu rihun $100 ho nia ezekusaun ba faze dahuluk ezekuta 50% no ba faze daruak nia ezekusaun 50%.
Antes ne’e, iha 16 agostu 2023, Governu liuhosi Sekretáriu Estadu Dezenvolvimentu lokál, Mateus dos Santos Tallo hala’o ona diálogu hodi husu Autoridade Covalima aprezenta relatóriu servisu implementasaun Programa Mão de Obra Postu Administrativu (PMOPA) no implementasaun projetu Programa Nasionál Dezenvolvimentu Suku, iha Munisípiu Covalima.
Iha diálogu ne’e, nia husu xefe suku sira kona-ba projetu PNDS no husu mós administradór postu sira foku ba implementasaun Programa Mão de Obra Posto Administrativu (PMOPA) ne’ebé hala’o implementasaun ba faze dahuluk no daruak la’o oinsá.
Jornalista : Celestina Teles
Editór : Cancio Ximenes
