COVALIMA, 16 agostu 2023 (TATOLI)–Governu liuhosi Sekretáriu Estadu Dezenvolvimentu Lokál, Mateus dos Santos Tallo, liuhosi diálogu husu Autoridade Covalima atu aprezenta relatóriu servisu implementasaun Programa Mão de Obra Postu Administrativu (PMOPA) no implementasaun projetu Programa Nasionál Dezenvolvimentu Suku (PNDS) iha Covalima.
Notísia Relevante: Implementasaun PMOPA faze dahuluk iha Covalima finaliza ona
“Objetivu hosi vizita ida-ne’e diretór no administradór postu sira, xefe suku sira atu relata relatóriu progresu implementasaun programa sira-ne’e iha Covalima ba Governu,” Mateus dos Santos Tallo hateten liuhusi diskursu iha salaun AMC, Sukaer Laran, kuarta ne’e.
Membru Governu ne’e husu autoridade Covalima atu apresenta imlementasaun programa iha munisípiu Covalima bazeia ba simu orientasaun hosi Primeiru-Ministru kona-ba implementasaun projetu PNDS hanesan Uma Naroman ba Povu (UNP) regular no UNP+ A no B.
“Ha’u simu orientasaun hosi Primeiru-Ministru, Kay Rala Xanana Gusmão, husu xefe suku sira ho urjente ami tun mai koordena liuliu implementasaun programa projetu PNDS hahú tinan 2020-2023, hanesan Uma Naroman ba povu regulár, UNP Plus A no B,” nia dehan.
Programa PNDS ne’ebé implementa hahú iha tinan 2022 to’o 2023 iha suku 30 ho totál projetu ne’ebé la’o ona, balun sei iha prosesu konstrusaun nia laran, totál projetu hira mak seidauk implementa no totál orsamentu ne’ebe sei iha konta bankária hosi suku presiza atu foti dokumentu.
Tuir informasun, suku ne’ebé katégoria rurál barak seidauk implementa tanba haree kondisaun estrada no mós husu atu entrega dokumentu la’ós atu julga maibé hateten de’it, nune’e antes elobora planu asaun 2024 tenke iha ona dadus, nune’e primeiru-ministru bele deside programa nia kontinuidade.
Aleinde husu xefe suku konaba projetu PNDS, nia mós husu administradór postu sira foku ba implementasaun Programa Mão de Obra Posto Administrativu (PMOPA) ne’ebé hala’o implementasaun ba faze dahuluk no daruak nian ne’e la’o oinsa ona.
“Ami hakarak hatene nia implementasaun keta hili malu familiarista ne’e problema. Tanba, matadalan PMOPA nia objetivu klaru atu hadi’a situasaun kondisaun sosiu ekonomia. Ita hakarak haree nia implementasaun, nune’e tenke fornese lista prejznsa bainhira ema ida servisu faze dahuluk no daruak, signifika situasaun komunidade iha baze laiha balansu,” nia dehan.
Implementasaun Programa Mão de Obra Postu Administrativu (PMOPA) presiza atu haree no Projetu Programa Nasionál Dezenvolvimentu Suku (PNDS) sei halo revizaun hodi mellora di’ak-liu atu enkaixa hotu iha PNDS aumenta nia atividade no orsamentu.
Diretór Finansa Munisípiu Covalima, Damião Amarál, hateten pagamentu ba implementasaun Programa Mão Obra Postu Administrativu (PMOPA) ba faze dahuluk finaliza no ba faze daruak mós transfere ona, tanba orsamentu PMOPA nia iha rubrika transferénsia públika.
Antes ne’e, Sekretáriu Administrasaun,Munisípiu Covalima, Francisco de Jesus Alves, relata implementasaun Programa Mão de Obra Postu Administrativu (PMOPA) fó prióridade ba programa hanesan reflorestasaun, limpeza no hadi’a estrada.
Implementasaun PMOPA iha kada postu Administrativu aloka orsamentu rihun $100 ho nia ezekuzaun faze dahuluk ezekuta 50% no ba faze daruak ezekuta 50%.
Jornalista : Celestina Teles
Editór : Cancio Ximenes
