ANP, I.P komunika ho empreza importadór antisipa folin kombustível
DILI, 22 setembru 2023 (TATOLI)—Entidade hosi Autoridade Nasionál Petróleu, Institutu Públiku (ANP, I.P) halo ona komunikasaun no koordenasaun ho empreza importadór hodi antisipa folin kombustível sa’e iha rai-laran.
“Ha’u haree presu ne’ebé sa’e liu $90/barir. Ida-ne’e fó implikasaun ba presu kombustível iha rai-laran, tanba ita hotu adota sistema merkadu livre, mesmu nune’e Autoridade Nasionál Petróleu iha diálogu no kontaktu ho operadór importadór kombustível sira, atu nune’e presu ne’ebé estabelese ita kompreende katak iha marjen ne’ebé mak sira tenke halo hodi hetan lukru, ita mós kompreende katak ema la uza fali oportunidade ne’e atu hasa’e presu ne’ebé maka la tuir dalan, katak fó espasu ba ema hotu atu halo negósiu maibé tenke tuir dalan, katak profit ne’ebé apropriadu duni no la prejudika fali ema tomak,” Prezidente Konsellu Diretivu ANP, I.P, hateten iha salaun Delta Nova, sesta ne’e.
Notísia relevante : Primeiru-Ministru garante Timor-Leste sei la hasoru krize kombustível
Nia dehan, ANP nafatin loke biban ba diálogu, kontaktu no diskusaun ho operadór sira iha área kombustível atu nune’e iha balansu entre operadór sira ninia hakarak atu hetan lukru barak no bele fó justisa ba komunidade ein jerál.
Papel seluk ne’ebé ANP sei kontinua toma konsiderasaun maka atu garante distribuisaun fornesimentu nomós distribuisaun kombustível sufisiente. Tanba ne’e, aleinde presu, ANP haree mós kona-ba fornesimentu ne’e rasik atu nune’e konsumidór sira ne’ebé iha nesesidde ba kombustível bele hetan atendimentu.
Prezidente institutu dehan, laiha lei ida mak hateten katak empreza operadór bele hasa’e folin no laiha limitasaun ka barreira ida ein termu presu fiksu, katak labele sa’e. Maibe ANP kontinua monitoriza, karik iha sei halo komunikasaun hodi nune’e iha nafatin balansu iha merkadu.
Durante ne’e sempre iha kooperasaun di’ak entre Empreza sira ne’ebé hola parte iha fornesimentu kombustível iha rai-laran ho ANP.
“Ha’u fiar katak sira hotu sei nafatin nakloke, no daudaun ami iha hela kontaktu ho sira atu nune’e ita bele antisipa situasaun ne’ebé piór,” nia adianta.
Tuir dadus hosi ANP, presu kombustível iha postu abastesimentu iha Timor-Leste iha loron sesta ne’e, hatudu katak postu abastesimentu iha Dili laran kompostu hosi 68 Petroleum Lda, 99 Petroleum Lda, Chon Ti Petroleum Lda, Mega Petroleum Lda, Super Fuel Lda, presu gazolina kada litru $1,25 no gazoel $1,34.
Iha Postu abastesimentu Aitula fuel Lda gazolina kada litru $1,27 no gazoel $1,30, Arjumar Unipessoal Lda, gazolina kada litru $1,19 no gazoel $1,16, Belak G & C Unipessoal Lda gazolina kada litru $1,27 no gazoel $1,35, Borala Lda gazolina kada litru $1,23 no gazoel $1,27, CDFC unipessoal Lda gazolina kada litru $1,20 no gazoel $1,28, Culu Hun Fuel Station Lda presu gazolina kada litru $1,22 no gazoel $1,32.
Nune’e mós, East Gas Corporation Lda presu gazolina kada litru $1,27 no gazoel $1,34, Ergin Fuel Lda gazolina kada litru $1,25 no gazoel $1,31, Esperansa Timor Oan (ETO) Lda Balide presu gazolina kada litru $1,18 no gazoel $1,20, Lafahel Oil & Gas Unipessoal Lda gazolina kada litru $1,35 no gazoel $1,40, Mãe da Graça Unipessoal Lda Bebonuk no Mãe da Graça Unipessoal Lda Raikotu presu gazolina kada litru $1,25 no gazoel $1,28, Melar Fuel Unipessoal Lda gazolina kada litru $1,22 no gazoel $1.27.
Mira Mar Unipessoal Lda gazolina kada litru $1,18 no gazoel $1,20, Moundias Unipessoal Lda gazolina kada litru $1,21 no gazoel $1,32, Nundole Wey Full Station Lda gazolina kada litru $1,27 no gazoel $1,34, Pertamina Internasional Timor S.A Lda gazolina kada litru $1,20 no gazoel $1,28, Realistik Fuel Unipessoal Lda Hera no Caicoli gazolina kada litru $1,19 no gazoel $1,16, no Xalila Fuel Unipessoal Lda gazolina kada litru $1,27 no gazoel $1,36.
Jornalista : Antónia Gusmão
Editora : Julia Chatarina
