DILI, 09 juñu 2023 (TATOLI)–Primeiru-Ministru (PM), Taur Matan Ruak garante katak Timor-Leste sei la hasoru krize kombustível tanba Autoridade Nasionál Petróleu no Minerál (ANPM) fó sai ona katak kombustível sei mai tan semana oin.
“Kombusível kuandu laiha labele rona informasaun tun-sa’e pániku ona maibé tenke rona hosi ANPM no Ministériu Petróleu. Ha’u haree ema lori jerigen ba trankada iha estasaun kombustível sira, maibé iha konferénsia imprensa ida hosi ANPM katak mina sufisiente, dala barak sira hakarak sira-nia mina folin entaun sira lansa informasaun oinoin para ema nadodon ba,” PM Taur hateten hafoin ramata reuniaun ho Xefe Estadu, iha Palásiu Prezidensiál, Bairru Pité, sesta ne’e.
Notísia relevante : ANPM konfirma semana oin estoke kombustível bele normál fali
PM Taur preokupa bainhira populasaun rona informasaun ruma seidauk konfirma loloos pániku ona.
“Ha’u hanoin informasaun mina laiha ne’e la loos, maibé kuandu loos mós naturalmente sei fó sai ba públiku no Governu mós la dukur atu husik situasaun ne’e hanesan ne’e, ita imajina mina laiha ne’e eletrisidade laiha, motorizada no karreta la halai, ne’e paraliza país ne’e tanba ospitál la funsiona, imajina saida mak akontese ba moras sira,” nia akresenta.
ANPM informa postu abastesimentu kombustível sira ne’ebé mak taka tanba menus kombustível, maibé semana oin bele loke no funsiona normal filafali.
Jornalista : Antónia Gusmão
Editora : Julia Chatarina