OÉ-CUSSE, 22 setembru 2023 (TATOLI) – Xefe suku Bene-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), Marcos Meni, informa, folin foos iha merkadu tradisionál Baoknana inklui kioske sira, fa’an foos kilograma 25 ho presu $20,50, kompara ho antes saka ida $14,50.
“Sé ita kompara ho antes no agora folin sa’e maka’as, tanba iha ha’u-nia suku Bene-Ufe iha merkadu tradisionál ida iha Baoknana, kada loron kuarta loron bazár, sira hosi Oé-Cusse vila mai fa’an sasán iha-ne’e folin iha mudansa, balu to’o $20,50 ne’e kilograma 25, maibé antes ne’e saka ida $14,50,” nia dehan ba Agência Tatoli iha aldeia Citrana, kinta ne’e.
Nia husu, tuir loloos Governu Sentrál presiza halo intervensaun, tanba folin foos sa’e hahú kedas hosi vila mai to’o área rurál aumenta sa’e-tán.
“Agora tempu bailoro hanesan ona sa tán kuandu tempu udan, iha impedimentu ba udan no mota bele sa’e to’o $25 saka ida, sei Governu husik lakohi kontrola, ha’u hanoin ita hotu preokupa, sira-ne’ebé la servisu hanesan agrikultór bainbain laiha kbi’it atu sosa, entaun Governu presiza haree ida-ne’e,” nia sujere.
Monica de Assunção Marques nu’udar kioske ida iha suku Bene-Ufe, sub-rejiaun Nítibe hateten, uluk kilograma 20 nia folin ne’e $11,50, agora sa’e ona $14,50 balu to’o $15, kuandu kilograma 25, uluk $13,75 agora sa’e, balu $19,50 balun $20.
“Ha’u hanesan fa’an na’in, bainbain ami ba foti iha Oé-Cusse vila, sa’e kedas hosi ne’ebá, depois ami tula mai presiza sura mós ho transporte, entaun ha’u paling tama mak $0,50 ka $1,” nia katak.
Notísia relevante: Governu presiza intervein folin foos iha Oé-Cusse, saka ida $20
Jornalista : Abílio Elo Nini
Editór : Evaristo Soares Martins
