Joven ida hetan tiru iha Lautem halo ona tratamentu iha HNGV
DILI, 22 setembru 2023 (TATOLI) – Xefe Departamentu Emerjénsia iha Hospitál Nasionál Guido Valadares (HNGV), Eldegar Lopes Martins, hateten joven ida ne’ebé hetan tiru iha Munisípiu Lautem daudaun ne’e halo hela tratamentu saúde iha HNGV.
“Ohin tuku 12:00 meudia ne’e ami simu pasiente transferénsia ida husi Munisípiu Baucau ho naran Martinho Gusmao, idade 26 ne’ebé antes ne’e dehan hetan tiru iha nia ain rua iha Munisípiu Lautem”, Eldegar Lopes Martins hateten ba TATOLi iha nia fatin HNGV, ohin.
Nia informa, pasiente ne’e to’o iha HNGV haree kondisaun katak iha Baucau halo ona tratamentu ka kurativu entaun haree ba kondisaun jerál di’ak maibé iha nia ain rua ne’e hotu tiru kona, entaun doutór sira halo tratamentu no hasai raiu-x hatudu katak nia ain karuk ne’e mak trauma ka tohar no ida sorin ne’e kondisaun di’ak.
“Agora daudaun iha hela emerjénsia, doutór sira estabiliza ona no halo ona tratamentu ba nian para muda ba iha fatin sururjia atu hetan tratamentu no baixa ne’eba depois atu halo operasaun ka oinsá ne’e horsida doutór sira husi sirurjia mak foti desizaun”, nia esplika.
Kazu oknum tiru joven ne’e akontese maizumenus iha tuku 19:00 kalan, area Pairara, Suku Maina I, bainhira PNTL sira tun ba halo atusaun iha konfrontu ida, iha Oknum Polísia deskonfia uza arma pistola tiru joven Martinho Gonsalves.
Notísia relevante : Ekipa konjunta konklui investigasaun oknum PNTL tiru joven iha Lautém
Jornalista : Felicidade Ximenes
Editór : Zezito Silva
