DILI, 22 setembru 2023 (TATOLI)—Primeiru-Ministru (PM), Kay Rala Xanana Gusmão, hamutuk ho delegasaun ne’ebé sai hosi Dili iha kuarta (20/09) to’o ona iha sidade Hangzhou, Repúblika Popular Xina iha kinta (21/09) hodi partisipa iha abertura Jogu Aziátiku (Asian Games) 2023 ba dala-19 iha loron 23 setembru no sei ramata iha loron 08 outubru.
Tuir nota ne’ebé Agência Tatoli asesu iha sesta ne’e, Xefe Governu Xanana no delegasaun halo tránzitu iha Singapura no ikus mai kontinua viajen ho aviaun Xianmen Airlines-MF874 to’o Aeroportu Internasionál Hangzhou Xiaoshan iha oras 19:35 kalan, ne’ebé hetan boas vindas ho ai-funan hosi estudante, akompaña direita hosi Ministru Transporte Xina Li Xioa Peng, Vise-Governadór Provínsia Zhejiang Li Yanyi, Embaixadora Xina foun ba Timor-Leste Wang Wenli, Embaixadór Timor-Leste ba Xina Abrão Santos.
Aleinde ne’e, Xefe Delegasaun Timor-Leste ba Asian Games Mateus da Cruz hamutuk ho ekipa akompaña mós xegada PM ho delegasaun, ne’ebé simu ho formatura parade militár no estudante hananu múzika bemvindu no dansa tradisionál Xina nian.
Notísia relevante : PM Xanana no delegasaun desloka bá Xina partisipa Asian Games
Hosi Aeroportu, ekipa kontinua desloka kedas ba otél Sofitel ne’ebé prepara ona no Xefe Governu kontinua konvoka enkontru ho Embaixadór Timor-Leste iha Xina Abrão Santos hodi atualiza ajenda prinsipál aberuta eventu Jogu Aziátiku no deskute mós agenda prinsipál reuniaun bilaterál entre Xanana, membru Governu balun ho Prezidente Repúblika Populár Xina Xi Jimping no ekipa iha loron 23 setembru 2023.
Delegasaun hosi Timor-Leste kompostu hosi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente Francisco Kalbuadi Lay, Ministru Administrasaun Estatál Tomás do Rosário Cabral, Ministru Planeamentu Investimentu Estratéjiku Gastão de Sousa, Ministru Juventude, Desportu, Arte no Kultura Nélio Isaac no entidade relevante seluk.
Hangzhou nu’udar sidade ida hosi provínsia Zheuhiang, ne’ebé Prezidente Xi Jimping deside hodi hala’o eventu Jogu Aziátiku ba dala-19 tanba sidade ne’e nu’udar provínsia istóriku Xina, ne’ebé hahú ninia prosesu dezenvolvimentu infraestrutura no ekonomia forte to’o ohin loron.
Jornalista : Antónia Gusmão
Editora : Julia Chatarina
