DILI, 20 setembru 2023 (TATOLI)—Primeiru-Ministru (PM), Kay Rala Xanana Gusmão hamutuk ho delegasaun, kuarta ne’e, desloka bá Repúblika Popular Xina hodi partisipa abertura Jogu Aziátiku (Asian Games) 2023 ba dala-19 ne’ebé sei hala’o iha sidade Hangzhou, iha loron 23 setembru to’o 08 outubru 2023.
“Iha vizita ne’e, Xefe Governu Xanana sei partisipa uluk iha aberta Asian Games ne’ebé sei lansa hosi Prezidente Repúblika Popular Xina, Xi Jinping iha loron 23 Setembru 2023,” refere nota ne’ebé Agência Tatoli asesu.
Eventu desportu mundiál ne’e partisipa hosi atleta ho modalidedade oin-oin hosi nasaun sira inklui Timor-Leste.
Aleinde ne’e, Xefe Governu sei hasoru malu no halo enkontru ofisiál ho Prezidente Repúblika Popular Xina, Xi Jinping hodi deskute kooperasaun bileterál rai rua.
Notísia relevante :Despede atleta Asian Games, Xanana komprometidu dezenvolve desportu
Hafoin ekontru ho Xefe Estadu Xina, PM Xanana ne’ebé akompaña hosi Embaixadór Timor-Leste ba Xina, Abrão Santos sei hasoru mós estudante timor-oan sira ne’ebé hala’o estudu iha Xina.
Entretantu, Governu Xina mós konvida atleta timor-oan hamutuk na’in-58 hodi partisipa Jogu Aziátiku ne’e.
Atleta timor-oan 58 ne’e kompostu hosi feto 24, fahe ba atleta feto na’in-ualu no ofisiál feto na’in-16, enkuantu mane na’in-34, fahe ba federasaun 10 hanesan Tenis Kampu, Atletizmu, Taekwondo, Karate-do, Natasaun, Federasaun Tiru, Boxe, Federasaun Halterofelizmu, Badminton no Vollybool Praia.
Vizita Xefe Governu bá Xina akompaña direita hosi Vise-Primeiru-Ministru, Ministru Koordenadór Ekonómiku no Ministru Turizmu no Ambiente Francisco Kalbuadi Lay, Ministru Negósiu Estranjeiru no Kooperasaun Bendito dos Santos Freitas, Ministru Administrasaun Estatál Tomás do Rosário Cabral, Ministru Juventude, Desportu, Arte no Kultura Nelio Isaac, inklui Ministru Planeamentu no Investimentu Estratéjiku Gastão Sousa.
Jornalista : Antónia Gusmão
Editora : Julia Chatarina
