DILI, 22 setembru 2023 (TATOLI) – Sentru formasaun rua, iha Aileu no Dili, laiha ekipamentu adekuadu atu halo prosesu aprendizajen ba ema ho defisiénsia sira.
Diretór-Ezekutivu Asosiasaun Defisiénsia Timor-Leste (ADTL), Cesário da Silva, relata informasaun ne’e hafoin halo observasaun ba sentru rua ne’e no nia sujere bainhira Minstériu Edukasaun harii sentru sira ne’e tenke kompleta ho nia ekipamentu.
“Tenke prepara ekipamentu hodi fasilita no tulun ema ho defisiénsia sira asesu ho di’ak. Iha tinan ne’e, ami bá halo observasaun iha sentru rua no konsege identifika katak laiha ekipamentu esensiál hanesan kadeira roda hodi atende sira hodi partisipa iha prosesu aprendizajen”, Cesário da Silva hatete iha Caicoli.
Aleinde ekipamentu, ADTL mós deskobre katak profesór balun ne’ebé hanorin ema ho defisiénsia seidauk domina matéria.
“Sira seidauk iha koñesimentu kona-ba letra braille no lian jestuál hodi hanorin ema ho defisiénsia sira. Problema hirak ne’e difikulta ema ho defisiénsia atu partisipa iha prosesu aprendizajen iha sala laran”, nia preokupa.
Tanba ne’e, nia husu ba Ministeriu Edukasaun atu fasilita sentru formasaun rua ne’e hodi apoia ema ho defisiensia sira-nian prosesu estudu. Difikuldade ida ne’e halo sira labele asesu edukasaun ho di’ak.
Diretór Nasionál Ensinu Rekorrente, Alfredo de Araujo, hatete Ministériu Edukasaun, liuhusi Diresaun Jerál Planu no Inkluzaun prepara ona rekursu ne’ebé apropriadu atu halo asisténsia ba ema ho defisiénsia sira.
“Ita presiza rekursu ne’ebé apropiadu nune’e bele fó asisténsia di’ak ba ita-nian estudante sira ne’e. Daudaun iha eskola bázika balun iha Dili, hanesan EBC Farol no iha Aileu hola parte ona iha enkontru ida ne’e”, afirma.
Notísia relevante: ADTL prepara EhD na’in rua ba programa Advokasia no Psiko-sosiál
Jornalista: Tomé Amado
Editora: Maria Auxiliadora
