Autoridade Covalima halo sensibilizasaun lala’ok eleisaun suku iha postu finaliza ona
COVALIMA, 23 setembru 2023 (TATOLI)–Sekretáriu Administrasaun Munisípiu Covalima, Francisco de Jesus Alves, hateten autoridade Covalima forma ekipa hala’o sensibilizasaun lala’ok eleisaun suku iha postu administrativu hitu iha Covalima ne’e finaliza ona.
Notísia Relevante: SEI enkoraja feto Covalima konkorre iha eleisaun suku
“Eleisaun suku besik mai ona no Ministériu Administrasaun Estatál (MAE) hato’o kalendáriu atu hala’o sensibilizasaun ba postu administrativu hitu, ita finaliza ona. Maibé, iha posibilidade sei ba to’o iha suku iha área rural tanba ita fahe ona ekipa,” Francisco de Jesus Alves hateten ba Agência Tatoli iha resintu AMC, sesta ne’e.
Preparasaun atu realiza ba eleisaun suku, nia dehan, autoridade Covalima forma ekipa haat ne’ebé atu hala’o sensibilizasaun lei númeru 9/2016 no lala’ok eleisaun iha postu administrativu hitu.
Tuir oráriu ekipa sira hahú hala’o sensibilizasaun iha kinta (21 setembru 2023)) iha postu administrativu Fatumea, Fohorem no Fatululik no iha sesta (22 setembru 2023) kontinua iha postu administrativu Suai, Maucatar, Zumalai no Tilomar, ne’ebé finaliza ona.
“Ita hala’o sensibilizasaun lei númeru 9/2016 no lala’ok eleisaun suku, ita iha postu administrativu hitu iha kobre hotu ona,” nia dehan.
Tuir planu, autoridade Covalima mós sei kontinua hala’o sensibilizasaun iha suku sira-ne’ebé menus partisipasaun durante hala’o sensibilizasaun lala’ok eleisaun suku.
“Ha’u simu relatóriu hosi ekipa iha postu Fohorem katak suku Dato Tolu partisipasaun ladún, tanba tempu bailoro família halo lia entaun ita sei trasa planu hala’o sensiblizasaun iha suku Dato Tolu,” nia hateten.
Munisípiu Covalima iha postu administrativu hitu mak hanesan postu administrative Fatululik, Fatumea, Fohorem, Maucatar, Tilomar, Suai no postu admninistrativu Zumalai ho suku hamuutk 30 no aldeia hamuutk 148.
Notísia Relevante: STAE Covalima halo rekrutamentu ba PSAS-PSAA finaliza ona
Jornalista : Celestina Teles
Editór : Cancio Ximenes
