COVALIMA, 22 setembru 2023 (TATOLI)–Diretór Sekretariadu Tékniku Administrasaun Eleitorál (STAE) munisípiu Covalima, Francisco Gusmão, hateten STAE Covalima halo rekrutamentu pesoál STAE apoiu Suku (PSAS) no Pesoál STAE Apoiu Aldeia (PSAA) hodi prepara ba eleisaun suku ne’e finaliza ona.
Notísia Relevante: STAE Covalima rekruta PSAS-PSAA 326 ba eleisaun xefe suku
“Ita-nia prosesu rekrutamentu ne’e tama ona iha faze ikus liu ita fó teste entrvista ne’ebé finaliza ona no fó sai ona nia rezultadu,” Francisco Gusmão hateten ba Agência Tatoli, iha nia servisu fatin, Kampung Baru, sesta ne’e.
Tuir kalendáriu, Pesoál STAE Apoiu Suku (PSAS) sei asina sira-nia kontratu iha loron 01 fulan-outubru tinan ne’e, no Pesoál STAE Apoiu Aldeia (PSAA) ne’e molok eleisaun mak foin bele asina sira-nia kontratu.
Prosesu rekrutamentu atu prepara ba eleisaun suku, PSAS presiza na’in-30 ne’ebé kada suku sei destaka pesoál nain-ida no PSAA na’in-48.
Durante STAE Covalima fó sai vaga iha kuadru avizu, kandidatu ne’ebé mak konkore vaga no pasa iha faze entrevista hamutuk na’in-48 ba iha PSAA no PSAS ne’e iha na’in-30.
Tuir planu, STAE Covalima sei fó formasaun ba Pesoál STAE Apoiu Aldeia (PSAA) ne’e iha loron 04-06 outubru 2023 no formasaun ba Oesoál STAE Apoiu Suku (PSAS) durante loron lima ne’ebé formasaun hahú iha loron 16-20 outubru 2023.
Tuir dadus hosi Sekretáriu Tékniku Administrasaun Eleitorál (STAE) Covalima, totál eleitór hosi munisípiu Covalima ne’ebé mai hosi postu administrativu Fatululik, Fatumea, Fohorem, Tilomar, Maucatar, Zumalai no Suai hamutuk 49,469 ne’ebé kompostu hosi mane hamutuk 2.5220 no feto hamutuk-2.4216.
Aleinde ne’e, STAE mós rejista eleitór ne’ebé mate iha munisípiu Covalima hamutuk na’in-353 ne’ebé kompostu hosi mane na’in-186 no feto 167.
Tuir baze dadus iha tinan 2022, STAE Covalima rejista eleitór elijível hamutuk 48830 kompostu hosi mane 24950 no feto 23880.
Notísia Relevante: STAE Covalima rejista eleitór foun 167 iha setembru
Journalist : Celestina Teles
Editór : Cancio Ximenes
