Governu rekoñese MKI Covalima menus rekursu umanu-fasilidade ba funsionáriu sira
COVALIMA, 23 setembru 2023 (TATOLI)–Ministru Komérsiu no Indústria (MKI), Filipus Nino Pereira, rekoñese MKI Covalima sei menus rekursu-uamau no fasilidade ba funsionáriu sira atu hala’o sira-nia servisu no seidauk iha edifísiu ba funsionáriu sira atu hala’o sira-nia kna’ar hos di’ak.
Notísia Relevante: MKI Covalima menus rekursu umanu no transporte
“Ita iha ona planu atu bele hetan fatin no oinsa bele halo reabilitasaun ba fatin sira, maske hato’o ona karta maibé seidauk iha resposta,” Filipus Nino Pereira hateten ba jornalista sira iha salaun otél Joya, Camanasa, sábadu-ne’e.
Governante ne’e nafatin fó atensaun tanba serbisu liga atu halo monitorizasaun sasán ne’ebé sirkula no servisu administrasaun la’o interrese komérsiu no interrese indústria nian.
Ho difikuldade ne’ebé funsionáriu Ministériu Komérsiu no Indústria iha enfrenta, nia parte sei haree fasilidade hodi prevee Orsamentu Jerál Estadu tinan 2024.
“Iita sei haree fasilidade balun hodi tau orsamentu iha tinan 2024 oinsá fasilita movimentu servisu hotu ne’ebé ita-nia pesoál sira iha ministériu rasik hodi bele hala’o,” nia dehan.
Antes ne’e, iha 20 setembru 2023, Xefe Departamentu Ministériu Komérsiu no Indústria hato’o preokupasaun hanesan menus rekursu umanu no transporte hodi difikulta funsionáriu sira-nia servisu iha fronteira Mota Masin no vila laran.
Tuir dadus, funsionáriu ne’ebé servisu iha Ministériu Komérsiu no Indústria (MKI) Covalima hamutuk na’in-tolu (3).
Jornalista : Celestina Teles
Editór : Cancio Ximenes
