iklan

NASIONÁL, EDUKASAUN, HEADLINE

PM Xanana enkoraja estudante timor-oan iha Xina atu estuda didi’ak

PM Xanana enkoraja estudante timor-oan iha Xina atu estuda didi’ak

Primeiru-Ministru, Kay Rala Xanana Gusmão hasai foto hamutuk ho Asosiasaun Estudante Timorense iha Xina hafoin halo diskusaun, iha salaun enkontru otél Sofitel, sidade Hangzhou Provínsia Zheuhiang- Xina, iha domingu (24/09/2023). Imajen/Mídia GPM

DILI, 25 setembru 2023 (TATOLI)—Primeiru-Ministru (PM), Kay Rala Xanana Gusmão, hamutuk ho delegasaun hala’o enkontru ho Asosiasaun Estudante Timorense iha Xina (AETX) kuaze na’in-20, iha salaun enkontru otél Sofitel, sidade Hangzhou Provínsia Zheuhiang- Xina, iha domingu (24/09).

Biban ne’e, PM Xanana enkoraja estudante timor-oan sira ne’ebé hala’o estudu iha universidade sira iha nasaun Xina atu uza didi’ak oportunidade hodi apreende siénsia ne’ebé hetan hodi  bele aplika iha Timor-Leste.

“Imi estuda, labele lakon tempu, nune’e ikus mai imi ramata eskola imi fila bá Timor-Leste iha imi-nia futuru mak atu hadi’a rai ne’e. Imi halo serbisu di’ak maka sei fó valór ba Governu Xina atu kontinua fó nafatin oportunidade ba sira seluk bele mai beibeik eskola iha ne’e (Xina),” Xanana fó hanoin ba estudante.

Tuir Xefe Governu, hanesan estudante, bainhira bá eskola iha ema-nia rain, la’ós atu buka títulu masteradu no diploma, maibé importante liu mak apreende buat di’ak atu aplika iha Timor-Leste.

“Imi mai eskola la’ós atu mai hetan de’it diploma, maibé diploma ne’e só serve bainhira imi serbisu ona, no serbisu halo di’ak, nia rezultadu di’ak ba povu, serbí rai ho di’ak no iha espíritu nasionalizmu di’ak atu serbí rai ne’e. Ida-ne’e maka sei fó valór ba imi-nia an, família no nasaun nia presiza,” nia tenik.

Notísia relevante : PM Xanana reune ho Prezidente Xina Xi Jinping

Xefe Ezekutivu salienta, Governu sei kontinua koopera ho parseiru sira atu haree estudante sira iha universidade iha Dili bainhira eskola hetan valór di’ak sei rekomenda atu hetan bolsa estudu.

Aleinde ne’e, Governu sei kontinua kapasita estudante medisina iha nasaun Xina, Kuba, Indonézia no rai seluk tan, nune’e bainhira ramata eskola bele kontinua fali estudu doutoramentu no mestradu hodi prepara rekursu di’ak hodi bele kontribui ba dezenvolvimentu.

Biban ne’e, Embaixadór Timor-Leste iha Xina, Abrão Santo, informa nia parte kontinua rejista no tau-matan ba estudante sira bainhira hasoru problema ruma iha sira-nia estudu.

Diplomata ne’e orgullu tebes tanba durante ne’e timor-oan hirak ne’e hatudu didikasaun no disiplina hodi kumpre regra hotu ne’ebé Governu sira oferese ho bolsa estudu ne’ebé sira hetan.

“Sira uza oportunidade murak ne’e hodi apreende siénsia hotu-hotu, hanesan mensajen ne’ebé hato’o ona hosi Xefe Governu,” Diplomata ne’e dehan.

Nune’e mós, Prezidente AETX, Candle Monteiro no Vise-Prezidente, Goerge Almeida, ne’ebé reprezenta estudante tomak hato’o agradese ba mensajen furak hosi Xefe Governu no fó ona tempu hala’o enkontru hodi fó motivasaun ba sira.

“Ami agradese tebes ba Avo Nana no membru Governu sira bele fó oportunidade mai hasoru ami hodi hato’o mensajen furak. Ami sei halo esforsu hotu hodi estuda ho didi’ak,” Candle Monteiro kompromete.

Estudante timor-oan ne’ebé hala’o estudu iha Xina hamutuk 120-resin, durante ne’e hala’o sira nia estudu iha área medisina jerál, marketing, enjiñaria, jeolojia, kímika, arkitektura, enjiñaria sivíl, administrasaun, planu urbanu, dezeñu gráfiku, petróliu no areia seluk tan.

Estudante sira ne’e hetan bolsa estudu hosi Governu Xina hodi hala’o estudu iha universidade oin-oin iha Xina hanesan Beijing, Hangzhou, Shanghai, Wuhan, Fuzhou, Beijing, Nanjing no Hunan.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!