DILI, 25 setembru 2023 (TATOLI)–Primeiru-Ministru (PM), Kay Rala Xanana Gusmão, ho akompañamentu hosi delegasaun, hala’o enkontru ho ninia omólogu, PM Koreia Súl, Han Duck-soo, iha Otél Grand Hyatt Hangzhou-Xina, domingu (24/09), hodi hametin kooperasaun bilaterál rai rua.
Enkontru amizade ne’e realiza bazeia ba pedidu Xefe Governu Koreia Súl ba Embaixada Timor-Leste iha Xina atu konvoka enkontru entre Xefe Governu rai rua hodi diskute kle’an liután apoia kooperasaun ne’ebé bele oferese ba Timor-Leste.
Biban ne’e, PM Xanana sente orgullu ba oportunidade hodi partisipa iha Jogu Aziátiku (Asian Games) ba dala-19 hodi bele hasoru ninia ómologu hodi deskute asuntu ne’ebé sei fó benefísiu ba povu no nasaun.
“Ami ko’alia no ha’u agradese ba Koreia liuhosi nia ajénsia KOICA ajuda ona ita, no sira atu halo kampu treinu desportu boot haat iha Timor,” Xanana Gusmão hateten liuhosi nota ne’ebé Agência Tatoli asesu, segunda ne’e.
Notísia relevante : Governu Koreia Súl sei apoia livru 6.000 ba SEFOPE
Xefe Governu rekoñese, Koreia Súl durante ne’e oferese apoiu hotu ne’ebé ajuda tebes iha prosesu kontrusaun Estadu no nasaun.
Nune’e, Xefe ezekutivu agradese ba domin hosi Governu no setór privadu koreanu ne’ebé timor-oan barak simu hodi bá serbisu hodi hetan kompeténsia no esperiénsia serbisu hodi ajuda hamenus númeru dezempregu iha Timor-Leste.
“Agradese ba sira ne’ebé simu ita-nia traballadór timor-oan bá serbisu iha área barak iha ne’ebá no Primeiru-Ministru koreianu hateten, sira hakarak oferese tan área serbisu balun ne’ebé sira hakarak ajuda nafatin,” Xanana tenik.
Iha fatin hanesan, Primeiru-Ministru Koreia Súl, Han Duck-soo komprometidu katak, sei kontinua apoia iha área desportu, apoia mós iha setór edukasaun no saúde, iha área agrikultura sei apoia Ministériu Agrikultura, Peska, no Reflorestasaun hodi kria ambiente ba eko-turizmu ne’ebé di’ak.
Governu Koreia Súl kontinua husu nafatin Governu Timor-Leste atu kapasita traballadór timor-oan hodi hetan oportunidade bá serbisu hodi buka esperiénsia ne’ebé bele fahe.
Jornalista : Antónia Gusmão
Editora : Julia Chatarina
