VIQUEQUE, 26 setembru 2023 (TATOLI)—Ministériu Agrikultura, Pekuária, Peska no Floresta (MAPPF) planeia ona atu halo levantamentu kondisaun tratór hamutuk 300 iha territóriu laran.
“Governu antes ne’e sosa tratór boot sira uza Orsamentu Estadu, maibé daudaun barak maka ho kondisaun a’at. Tanba ne’e, ami sei halo levantamentu ba tratór sira iha munisípiu hotu hamutuk 300 hodi identifika kondisaun tratór boot ho a’at naton, kma’an no totál. Karik hadi’a maka kustu boot, sei halo leilaun no ida ne’ebé bele hadi’a ami sei hadi’a,” Ministru Agrikultura, Pekuária, Peska no Floresta, Marcos da Cruz hateten ba iha suku Vessoru, tersa ne’e.
Notísia relevante : Servisu Agrikultura Viqueque seidauk konsege apoiu tratór boot ba komunidade
Governante ne’e dehan, kada tratór boot uluk sosa ho presu $35.000, tanba ne’e presiza haree filafali kondisaun.
“Ami mós planu ona sei sosa tan tratór boot iha tinan 2024 hodi ajuda ita-nia povu agrikutór sira hasa’e produsaun. Esforsu sira ne’e mak ami sei halo hodi fasilita agrikultóra sira,” nia hato’o.
Antes ne’e, Xefe Departamentu Programa Extensaun Agrikultura munisípiu Viqueque, Agostinho Pinto Mascarenhas, hateten, kada tinan komunidade agrikultór sira hosi postu administrativu Uatulari, Viqueque Vila no Ossu hatama ona pedidu atu halo atividade agrikultura maibé Servisu Agrikultura Viqueque labele responde tanba kondisaun tratór ladi’ak.
“Pedidu ne’e ami nafatin tau ba konsiderasaun, espera tinan oin bele responde komunidade nia pedidu,” nia dehan.
Tuir dadus hosi Servisu Agrikultura Viqueque, tratór boot hamutuk unidade 39 mak daudaun ne’e iha Viqueque, kompostu hosi tratór boot lima ho kondisaun di’ak, tratór ho kondisaun a’at naton 17 no a’at totál 17.
Jornalista : Vitorino Lopes da Costa
Editora : Julia Chatarina
