DILI, 26 setembru 2023 (TATOLI) – Ministériu Edukasaun (ME) deside ona hodi loke konkursu foun, iha tinan oin, ba profesór kontratadu 1.715 ne’ebé asina ona kontratu iha mandatu Governu anteriór nian.
Sekretáriu Estadu Edukasaun, Ensinu Sekundáriu no Eskola Téknika, Domingos Lopes Lemos, informa katak ME sei hapara kontratu manorin sira ne’e iha dezembru no loke fali konkursu foun ba sira.
“Ha’u hakarak hatete katak ita-nian profesór rihun-resin ne’ebé asina ona kontratu iha Governu anteriór, ita sei hapara iha dezembru. Depois ita loke fali vaga foun iha tinan oin maka sira bá kompete”, Domingos Lemos reitera iha sentru impresaun Comoro, ohin.
Nia dehan konkursu foun ne’ebé maka ministériu sei loke iha tinan oin ba profesór sira ne’e bazeia ba nesesidade eskola nian. “Ezemplu, eskola ida presiza profesór hanorin dixiplina fízika 10 de’it, ministériu mós sei loke vaga bazeia ba númeru profesór tuir nesesidade ne’ebé eskola presiza. Ne’ebé ministériu sei la loke vaga liu ida ne’e”. afirma.
Governante ne’e esplika razaun Ministériu Edukasaun tenke loke fali konkursu foun tanba iha levantamentu dadus identifika manorin sira barak maka hetan dupla kontratu.
“Sira hetan kontratu ona iha fatin seluk no kontinua hetan tan kontratu nu’udar profesór. Balun laiha dokumentu kompletu, laiha kartaun eleitorál, ida ne’e maka sai problema. Tanba ne’e, ministériu deside tenke hapara kontratu ne’e hodi loke fali vaga foun”, realsa.
Bainhira ME deside hapara kontratu manorin sira iha dezembru ne’e maka problema profesór reklamante sira mós sei la ko’alia tan, tanba hotu-hotu sei kumpre konkursu ne’ebé sei loke hodi hotu-hotu aprezenta sira-nian kandidatura.
Kestiona kona-ba hapara kontratu profesór sira maka sei implika ba ezame nasionál, Domingos Lemos afirma katak desizaun ne’ebé ME foti ne’e sei la fó impaktu ba ezame ne’ebé sei realiza iha loron 16 to’o 21 outubru.
Rekorde katak profesór sira ne’e asina kontratu ho Ministériu Edukasaun, Juventude no Desportu iha abríl 2023 no daudaun seidauk simu remunerasaun durante fulan sia nia laran.
Notísia relevante: Profesór kontratadu ameasa ‘boikota’ realizasaun ezame nasionál
Jornalista: Tomé Amado
Editora: Maria Auxiliadora
