Ministru Marcos bolu atensaun extensionista Viqueque serbisu ativu iha suku

VIQUEQUE, 26 setembru 2023 (TATOLI)—Ministru Agrikultura, Pekuária, Peska no Floresta, Marcos da Cruz, bolu atensaun ba extensionista destakadu iha Viqueque atu serbisu ativu iha suku hodi ajuda agrikultór sira hala’o atividade agrikultura.
“Ha’u rona extensionista balun la tun bá suku hodi fasilita ita-nia agrikultór sira no hanorin tékniku kuda, uza adubu no seluk tan. Nune’e, ha’u husu ba extensionista sira, ba oin presiza serbisu hanesan funsionáriu, tenke ativu iha suku tanba extensionista nia prezensa hodi ajuda agrikutór sira sosializa prátika agrikultura nune’e bele hasa’e produsaun hare,” Ministru hateten iha suku Vessoru, tersa ne’e.
Notísia relevante : MAP kontinua fó asisténsia tékniku ba extensionista sira iha munisípiu hotu
Governante ne’e dehan, Governu rekruta extensionista atu akompaña agrikultór tanba sira presiza extensionista ninia prezensa hodi aprezenta prátika no métodu agríkola.
“Extensionista sira tenke uza matenek sira ne’ebé hetan hodi aplika iha baze hodi hamutuk ho povu agrikultór sira prodús hare.
Maibé, sira lakoi akompaña agrikultór, aprezenta-an ba ha’u katak lakoi serbisu tanba estudante tékniku daudaun barak mak bele troka sira,” nia akresenta.
Iha sorin seluk, governante ne’e husu ba Autoridade lokál sira atu ajuda Ministériu Agrikultura, Pekuária, Peska no Floresta (MAPPF) kontrola extensionista sira tanba autoridade sira nu’udar liman no ain Governu iha baze.
“Ha’u husu ba Autoridade lokál, Xefe suku no Administradór sira atu ajuda kontrola funsionáriu sira ne’ebé destaka ba suku, bainhira sira la tama tenke hato’o. Ha’u koordena mós ho Diretór iha ministériu hodi tau matan ba extensionista sira hodi labele abandona suku,” nia tenik.
Iha fatin ketak, Xefe suku Uaitame, postu Uatulari, José do Rosário, relata, extensionista ne’ebé koloka iha suku daudaun laiha, uluk mai aprezenta-an iha suku depois agora la mosu.
“Extensionista ne’ebé destaka iha suku Uaitame ne’e agora bá tiha ne’ebé laiha. Ha’u telefone tuir, maibé la simu ha’u-nia xamada. Ha’u dehan bainhira ninia relatóriu lori mai ha’u, ha’u sei la asina tanba durante ne’e la marka prezensa iha suku hodi hanorin agrikultór sira,” nia dehan.
Tuir dadus, extensionista iha munisípiu Viqueque hamutuk 36, ne’ebé destaka iha suku 36.
Jornalista : Vitorino Lopes da Costa
Editora : Julia Chatarina

