MAP kontinua fó asisténsia tékniku ba extensionista sira iha munisípiu hotu
DILI, 10 fevereiru 2023 (TATOLI)—Ministériu Agrikultura no Peska (MAP), liuhosi Diresaun Nasional Estensaun Agríkola, kontinua fó asiténsia tékniku ba extensionista sira iha munisípiu hotu.
Diretór Nasional Extensaun Agríkola, Oscar Monteiro, hateten iha tinan 2008 to’o 2015 extensionista sira ne’e, tutela ba MAP. Maibé hahu iha tinan 2016 Governu entrega fali ba Ministériu Administrasaun Estatál (MAE) liuhosi Autoridade munisípiu mak jere.
“Agora dadaun MAP halo deit kooperasaun fó esisténsia tékniku, no fo kapasitasaun formasaun ba extensionista sira iha munisípiu hotu. Ida ne’e halo oinsá fanu sira iha terrenu akompañia ita-nia to’os na’in sira bele hasa’e produsaun,” Oscar Monteiro dehan ba Agência Tatoli via telefónika, sesta ne’e.
Nia dehan, uluk grupu extensionista sira sei tutela ba MAP sira rejistu ema hamutuk 412 hosi 2008 to’o 2009. Maibé informasaun ne’ebé sira hetan dadaun ne’e númeru la to’o ona 412 tanba hosi ema sira ne’e balun idade avansadu oan. Ho ida ne’e, agora dadaun iha deit 383.
“Haree hosi númeru ita hanoin la sufisiente tanba ita iha suku hamutuk 465. Ho ida ne’e, daudaun ne’e ema ida bele kobre suku tolu ka haat,” nia dehan.
Nia hatutan, atu aumenta númeru extensionista sira ne’e, MAP laiha kompeténsia atu ko’alia tanba entrega ona ba MAE. “ Ho ida ne’e MAE mak iha kompeténsia atu halo rekrutamentu,” Oscar hateten.
Jornaslista : Arminda Fonseca
Editora : Armandina Moniz
