SEKoop observa kooperativa lima iha Oé-Cusse hahú mudansa
OÉ-CUSSE, 27 setembru 2023 (TATOLI) – Sekretáriu Estadu Kooperativa (SEKoop), Arsénio Pereira da Silva, tersa ne’e hala’o vizita ofisiál ba kooperativa lima iha Rejiaun Administrativa Espesiál Oé-Cusse Ambeno (RAEOA), no hahú iha mudansa kompara tanba envolvimentu membru aumenta.
Sekretáriu Estadu Kooperativa hala’o vizita ba kooperativa lima ne’e mak hanesan, kooperativa Loriku Star, kooperativa KOMELI, kooperativa CU Enklave, kooperativa Fini Mor no kooperativa KHF maioria iha sub-rejiaun Pante Makasar.
“Ohin ha’u vizita kooperativa kuaze lima, mai hosi kreditu hotu no mesak exelente, mezmu balu foin hahú balu tinan 10 resin ona, maibé ninia dezenvolvimentu ne’e, kapa’as tebes, tanba balu uluk, iha ha’u-nia mandatu, kuandu mai vizita sei hahú seidauk iha edifísiu maibé ohin loron iha ona mudánsa, ne’e hatudu katak dezenvolvimentu setór kooperativa, la’o kapas tebes,” Arsénio Pereira da Silva, ba jornalista sira iha Oé-Cusse, tersa ne’e.
Tuir nia, iha Oé-Cusse maka kooperativa bo’otliu tanba ho kapitál mós bo’ot, kompara iha antes, no kooperativa kreditu sira mós barak iha Oé-Cusse ho sira-nia dezenvolvimentu avansadu tebes, ne’e signifika katak, sira-nia servisu badinas, kooperasaun servisu hamutuk iha kooperativa nia laran.
Tan ne’e Governante enkoraja nafatin, labele para nafatin ho ida-ne’e de’it, no labele orgullu ho buat ne’ebé iha maibé tenki kontinua nafatin ho ninia dezenvolvimentu no lala’ok, tanba kooperativa ne’e sai hanesan baze ekonómia iha ita-nia rai laran.
Tuir nia, sira-ne’e sira-ne’ebé envolve an ona, no sira-ne’ebé seidauk, bele hot-hotu envolve iha setór kooperativa tanba kooperativa, ita mak sai na’in, no buat hotu sei fila-fali ba ita idak-idak nia an, hodi dezenvolve kresimentu ekonómia uma-kain.
“Ha’u mós kontenti tebes tanba vizita ba kooperativa sira, atu fó solidariedade atu enkoraja mós sira-ne’ebé agora envolve an iha kooperativa, tanba númeru kooperativa iha Timor-Leste hamutuk 216, iha ativu 166 no ladún ativu 50 kooperativa,” nia katak.
“Maibé ha’u hakarak mai haree direitamente, para depois hatene, tanba agora daudaun hanesan akumulasaun hosi kooperativa sira hotu, ninia kapitál ne’ebé iha, entre millaun $13,5, ne’ebé kooperativa sira hot-hotu kontribui ona atu hasa’e kresimentu ekonómia liu-liu sira-ne’ebé envolve iha kooperativa,” nia informa.
Governante ne’e informa, planu hosi SEKoop rasik sei destaka funsionariu SEKoop iha munisipiu idak-idak, nune’e bele servisu hamutuk ho povu iha baze.
“Ha’u informa ona asuntu ne’e iha Prezidente Autoridade RAEOA, katak funsionáriu sira-ne’ebé barakliu iha nasionál sei destaka hotu iha idak-idak nia munisipíu, para sira mai servi inan-aman sira labele barakliu iha Díli depois la halo buat ruma, di’akliu fila ba munisipíu ita sei prodús ia-han no prodús buat ruma iha kooperatiba, nune’e bele muda ita-nia moris ekonómia, ida-ne’e desizaun SEkoop nian tama iha iha programa Planu Asaun Anuál,” nia katak.
Jornalista: Abílio Elo Nini
Editór: Evaristo Soares Martins
