FRETILIN kolabora ho bankada Governu iha konsensu ba eleisaun komisáriu CAC

DILI, 27 setembru 2023 (TATOLI)—Deputadu bankada FRETILIN iha Parlamentu Nasionál (PN), Antoninho Bianco, hateten FRETILIN kolabora hamutuk ho bankada Governu iha konsensu ba eleisaun Komisáriu Anti-Korrupsaun (CAC, siglá portugés).
Notísia Relevante: Eleisaun komisáriu CAC adia tanba bankada parlamentár laiha konsensu
“Prosesu la’o di’ak hela. Haree, bankada CNRT pronunsia data ona, ne’ebé hanoin rezultadu sei di’ak. Kandidatu sira-ne’ebé Governu aprezenta ne’e na’in-rua (2), nune’e tenke konsensu para ida de’it. Tanba ne’e, iha opsaun, CNRT prontu fó hanoin ba malu buka konsensu ida hetan ema ida di’ak-liu halo serbisu defende lia-loos,” Deputadu Antoninho Bianco hateten ba Agência TATOLI iha uma fukum PN, kuarta ne’e.
Entaun, ema-ne’ebé atu ba ne’e defende lia-loos baze ba lei mak orienta komisáriu, ne’ebé prosesu diálogu la’o beibeik no FRETILIN hein katak kabe ba CNRT partidu ne’ebé ka’er ukun fó hanoin, FRETILIN mós fó hanoin saida mak di’ak-liu.
PN tau ajenda katak reuniaun plenária hala’o iha tersa (26 setembru 2023) eleisaun komisáriu CAC maibé adi’a fali tanba laiha konsensu hosi bankada parlamentár, iha intervensaun bankada CNRT aseita atu adia ba loron seluk.
Parte bankada FRETILIN hato’o katak bankada FRETILIN iha ona entendimentu ruma ho bankada CNRT kona-ba kandidatura komisáriu CAC, maibé bankada CNRT adianta ona iha buat balun ne’ebé konserta didi’ak, tanba ne’e husu adia.
Deputadu Bianco la ko’alia kona-ba saida mak presiza konserta didi’ak tanba ne’e diskusaun internál bankada sira-nian, nune’e bainhira iha rezultadu semana ne’e mak iha semana oin sei ajenda eleisaun.
“Ha’u hanoin ami labele hateten buat ne’ebé hakarak, ami fó hanoin tetu hamutuk, depois ita haree rezultadu. Ami tetu hamutuk buka figura ida konsensuál depois ba serbisu interrese Estadu, asegura CAC bele kombate no prevene korrupsaun. Tanba ne’e, komunikasaun entendimentu la’o tiha ona. Hanoin kandidatu na’in-rua, entaun bele haree, tempu semana ne’e bele iha ona rezultadu ruma, ajenda eleisaun ba iha semana oin,” nia dehan.
Xefe bankada CNRT, Duarte Nunes, hateten sei halo aranju hodi hala’o ho bankada sira hotu hodi hetan konsensu molok ba eleisaun komisáriu CAC.
“Kuandu ita dehan konsensu, signifika ba iha ne’eba tenke konsensu. Ida-ne’e mak ami halo aranju oinsá mak bele akontese plenária ida-ne’e de’it. Tanba, ita ba vota mak halo serbisu makaas liután ba loby hotu-hotu konkorda ona mak ita avanza konsensu. Ita bele konsensu ka lae ida-ne’e mak buka tempu ko’alia ba malu,” nia dehan.
Nune’e, nia hateten, semana ne’e nia laran bankada CNRT sei ko’alia ho banakada sira seluk.
Antes ne’e, Governu liuhosi reuniaun Konsellu Ministru (KM) aprova proposta rezolusaun, ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN ba kargu komisáriu CAC hodi hetan aprovasaun.
Tuir lejislasaun ne’ebé vigora, naran sira-ne’ebé propoin hosi Governu, ne’ebé analiza no vota hosi PN no sira-nia designasaun sei presiza maiória absoluta hosi Deputadu ne’ebé marka presenza, pelumenus ¾ hosi deputadu ho funsaun efetiva.
Jornalista : Nelson de Sousa
Editór : Cancio Ximenes

