DILI, 26 setembru 2023 (TATOLI)—Parlamentu Nasionál (PN), adia eleisaun ba komisáriu Komisaun Anti-Korrupsaun (CAC, siglá portugés) ba fali semana oin.
Notísia Relevante: PPN fó tempu bankada Parlamentár buka konsensu ba eleisaun komisáriu CAC
“Ita adia eleisaun ba semana oin tanba bankada parlamentár laiha konsensu,” Prezidente Parlamentu Nasionál, Maria Fernanda Lay, hateten liuhosi reuniaun plenária PN, tersa ne’e.
Xefe bankada CNRT, Deputadu Duarte Nunes, hateten haree de’it iha plenária konsensu laiha sei la realiza.
“Entendimentu ne’e ita bele la’o. To’o pontu ida bele. Fó tempu tan uitoan, ne’e mak ita dehan entende malu. Ita buka hela ko’alia ho sira, ita hein to’ok to’o tempu dehan bele ajenda, hodi bele iha konsensu,” nia dehan.
Mezmu antes ne’e bankada CNRT ko’alia ona ho bankada Fretilin, maibé ohin nafatin laiha fali konsensu nune’e bankada Governu ba oin sei buka komunika nafatin, semana oin bele ajenda eleisaun.
Xefe bankada FRETILIN, Deputadu Aniceto Longuinhos Guterres Lopes, hateten bankada FRETILIN iha ona entendimentu ruma ho bankada CNRT kona-ba kandidatura komisáriu CAC, maibé hanesan bankada CNRT adianta ona iha buat balun ne’e konsentra didi’ak, tanba ne’e husu adia.
“Ami tenke aserta didi’ak pontu balun ho objetivu atu orsida komisáriu ne’ebé eleitu komisáriu konsensuál nível Parlamentu. Tanba ne’e, ami husu tempu halo tan esforsu ruma para aprezenta kestaun sira-ne’e halo loos mak depois ami sei informa ba meza ita avansa ba eleisaun
Intervensaun hosi Xefe bankada, PD, PLP, KHUNTO subskreve mós hanoin hosi bankada CNRT ho Fretilin, nune’e husu atu adia.
Notísia Relevante: PN adia eleisaun komisáriu CAC ba aban
Jornalista : Nelson de Sousa
Editór : Cancio Ximenes
