DILI, 25 setembru (TATOLI)—Parlamentu Nasionál (PN) adia eleisaun ba kandidatu komisáriu Komisaun Anti-korrupsaun (CAC, siglá portugés) ba tersa (26 setembru 2023) aban tanba kandidatu balun seidauk haruka karta aseitasaun.
Notísia Relevante: PN deside eleisaun komisáriu CAC sei hala’o iha 25 setembru
“Liga ho eleisaun komisáriu CAC, karta aseitasaun hosi kandidatu Rui dos Santos iha ona, maibé kandidatu Sérgio Hornai nian on the way (iha dalan hela) mai parlamentu. Simplesmente ha’u fó hatene de’it katak Sérgio Hornai la simu komunikasaun hosi Parlamentu katak nia tenke haruka karta aseitasaun, hodi nune’e aban mak ita hala’o eleisaun,” Prezidente Parlamentu Nasionál, Maria Fernanda Lay, hateten liuhosi reuniaun plenária PN, segunda ne’e.
Nia dehan, tanba bainhira laiha komunikasaun ba kandidatu hodi bele hato’o nia pedidu anulidade (anula) ba eleisaun ne’ebé halo, nia-parte husu deskulpa tanba lapsu hosi meza liuhosi parte tékniku la haruka karta ba fó hatene ba kandidatu.
“Ne’ebé, ohin liuhosi telefone, ne’ebé agora karta aseitasaun iha dalan ona. Ita hetan kontaktu ofisiál ona, ita hala’o votasaun aban,” nia hateten.
Tuir ajenda, PN loloos reuniaun plenária ohin (segunda, 25 setembru 2023) hala’o eleisaun ba kandidatu komisáriu CAC maibé labele realiza tanba lapsu tékniku.
Governu liuhosi reuniaun Konsellu Ministru (KM), foin lalais aprova proposta rezolusaun, ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN, ba kargu Komisáriu CAC hodi hetan aprovasaun.
Tuir lejizlasaun ne’ebé vigora, naran sira-ne’ebé propoin hosi Governu ne’ebé analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Antes ne’e, Komisáriu Komisaun Anti-korrupsaun (CAC, siglá portugés), Sérgio de Jesus Fernandes da Costa Hornai , nia mandatu ramata ona iha 21 janeiru 2023.
Notísia Relevante: Komisáriu CAC Sergio Hornai nia mandatu ramata iha 21 janeiru
Jornalista : Nelson de Sousa
Editór : Cancio Ximenes
