DILI, 27 setembru 2023 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu dekretu-lei ne’ebé aprova medida intervensaun temporária ba estabilizasaun presu foos iha merkadu, liuhosi atribuisaun subsídiu pekuniáriu ba empreza importadora sira.
“Presu foos importadu ne’ebé fa’an iha armazen empreza importadora no fa’an filafali ba konsumidór sira iha loja sira ne’ebé fa’an foos ho kuantidade uitoan ne’ebé ema barak liu maka konsume, estabiliza ho valór sentavu 50 kada kilograma,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Diploma ida-ne’e determina mós konstituisaun stock suplementár ida ba seguransa foos, ho tonelada rihun 30, hodi rai iha armazen Sentru Lojístika Nasionál (CLN, sigla portugés), ne’ebé destina ba intervensaun sosiál iha situasaun emerjénsia, liu-liu inundasaun, katástrofe naturál, motivu sanitáriu, solidariedade sosiál no atu fornese ba empreza grosista sira ka empreza sira ne’ebé fa’an ho kuantidade boot karik presiza.
Notísia relevante : Adérito Hugo klarifika Governu sei subsidia estoke foos tuan estabiliza presu
Benefisiáriu hosi medida ida-ne’e maka empreza sira ne’ebé fa’an ho kuantidade boot ka operadór ekonómiku sira ne’ebé komprova, liuhosi kópia autentikada hosi Autoridade Aduaneira, katak sira importa no simu ona kuantidade foos ho karaterístika ne’ebé define ona iha diploma ne’e, simu valór hamutuk $5 kada foos ho kilograma 25 ne’ebé importa ka fa’an.
“Implementasaun hosi media ida-ne’e, ninia objetivu mak atu fó satisfasaun nesesidade alimentár populasaun sira ho folin ida ne’ebé asesível liu hodi kompensa empreza importadora sira hosi folin importasaun nian no kria stock mínimu hamutuk foos tonelada rihun 30 ba situasaun emerjénsia,” nota hosi Governu esplika.
Nune’e, períodu vijénsia hosi medida ida-ne’e maka loron-180, hafoin diploma ne’e tama iha vigór, iha loron tuirmai hosi ninia publikasaun.
Jornalista : Antónia Gusmão
Editora : Julia Chatarina
