Timor-Leste no Repúblika Vietname sei selebra akordu tolu
DILI, 27 setembru 2023 (TATOLI)—Governu liuhosi reuniaun Konsellu Ministru (KM), kuarta ne’e, delibera hodi autoriza asinatura akordu tolu entre Timor-Leste, Repúblika Sosialista Vietname, ho Sentru Komérsiu Internasionál Nasaun Unida inklui Ministériu Komunikasaun no Informátika Repúblika Indonézia nian.
Akordu dahuluk, entre Governu Repúblika Demokrátika Timor-Leste no Repúblika Sosialista Vietname, ho objetivu atu fó izensaun ba titulár pasaporte diplomátiku, ofisiál ka servisu obrigasaun vistu iha país sira.
“Akordu ida-ne’e reflete relasaun metin no amigável entre nasaun rua, ho dezeju mútua hodi simplifika prosesu entrada ba sidadaun sira ne’ebé iha pasaporte diplomátiku, ofisiál ka serbisu válidu, tuir lei no regulamentu sira hosi país rua ne’e,” Ministru Prezidénsia Konsellu Ministru, Agio Pereira, relata, hafoin reuniaun ezekutivu, iha Palásiu Governu, kuarta ne’e.
Notísia relevante : CLN sei sosa foos importasaun tonelada 5.000 resin hosi Vietname
Akordu daruak, entre Governu Repúblika Demokrátika Timor-Leste no Sentru Komérsiu Internasionál Nasaun Unida (ITC, sigla portugés) Nasaun Unida ho objetivu atu asina akordu sede ida atu permite ITC formaliza ninia instalasaun iha Timor-Leste.
Nune’e, ho akordu ida-ne’e fó ba ITC, Ajénsia Nasaun Unida, ho estatutu hanesan ne’ebé Timor-Leste fó ba Nasaun Unida, ba ninia ajénsia no entidade iha país ne’e, tuir konvensaun internasionál sira ne’ebé ratifika ona hosi Parlamentu Nasionál no ho akordu ne’ebé asina ona entre Timor-Leste no Programa Nasuaun Unida ba Dezenvolvimentu (PNUD), aplika mós ba ajénsia no entidade sira seluk Nasaun Unida.
Enkuantu, akordu datoluk, entre Ministériu Transporte no Komunikasaun Timor-Leste no Ministériu Komunikasaun no Informátika Repúblika Indonézia, ho objetivu atu habelar no hadi’a koordenasaun no kooperasaun bilaterál iha área komunikasaun no informátika entre parte sira, hodi fornese enkuadramentu ida ba dezenvolvimentu kooperasaun iha área komunikasaun no informátika iha Timor-Leste tuir lei no regulamentu sira ne’ebé vigora iha país rua ne’e.
Jornalista : Antónia Gusmão
Editora : Julia Chatarina
