VIQUEQUE, 28 setembru 2023 (TATOLI)—Autoridade komunitária hosi Nahareka, postu administrativu Ossu, munisípiu Viqueque, preokupa ho abitante elejível na’in-500 daudaun seidauk iha kartaun eleitorál tanba hasoru difikuldade trata dokumentu sertidaun moris no Bilhete de Identidade (BI).
Xefe suku Nahareka, Nazário Soares Fernandes, hateten, fulan oin tama ona ba eleisaun suku (28 outubru), maibé abitante balun seidauk bele trata kartaun eletorál tanba kritéria presiza dokumentu seluk ne’ebé susar atu trata iha área rurál.
“Eleitór sira laiha dokumentu rua ne’e, entaun ida-ne’e hanesan ami-nia preokupasaun hanesan autoridade lokál tanba sira-nia idade 17 ba leten ona, loloos bele ezerse ona sira-nia diretu iha eleisaun suku. Maski Komisaun Nasionál Eleisaun (CNE, sigla portugés) dala barak enkoraja eleitór sira partisipa másimu iha eleisaun, maibé sidadaun sira ne’ebé laiha kartaun nafatin labele partisipa,” Autoridade suku relata ba Agência Tatoli, iha postu Ossu, kinta ne’e.
Notísia relevante : Servisu Notariadu Viqueque laiha blanku ba BI
Preokupasaun sira ne’e hato’o ona ba Servisu Rejistu Sivíl, maibé sira seidauk destaka mai suku Nahareka tanba iha área rurál liu, nune’e difísil atu trata dokumentu.
“Ha’u hato’o ona preokupasaun sira ne’e iha fulan-agostu, ha’u la’o to’o nasionál. Depois ba tan konfirma iha Rejistu Sivíl, maibé sira hatan dehan loron 15 setembru 2023 mak bele, maibé to’o agora sira seidauk destaka mai ami-nia suku, ha’u-nia esforsu maka ha’u halo ona. Fulan oin eleisaun ne’e eleitór foun sira ne’ebé idade to’o sei la partisipa iha eleisaun tanba laiha kartaun eleitorál,” nia akresenta.
Nune’e, foin lalais Xefe suku Nahareka konfirma tan ba Rejistu Sivíl iha munisípiu Viqueque, maibé sira dehan orsamentu maka seidauk alokadu, tanba ne’e maka seidauk destaka.
“Husu ba Governu atu tau konsiderasaun ba abitante sira-nia preokupasaun hodi trata sira-nia dokumentu, liu-liu sertidaun moris, BI no kartaun eleitorál hodi tempu eleisaun sira bele partisipa,” nia tenik.
Totál eleitór iha suku Nahareka hamutuk 1.490, abitante na’in-300 hetan ona dokumentu BI, enkuantu eleitór foun 500 seidauk iha kartaun eleitorál.
Abitante iha suku Nahareka hamutuk na’in-2.776 hosi uma-kain 634, kompostu hosi aldeia Makabu’u iha abitante na’in-358 no uma-kain 169, Mau Rate iha abitante na’in-265 no uma-kain 128, Darenau iha abitante na’in-274 no uma-kain 134, Samarogo iha abitante na’in-556 no uma-kain 103 no Raila’a iha abitante na’in-196 no uma-kain 100.
Jornalista : Vitorino Lopes da Costa
Editora : Julia Chatarina
