iklan

EKONOMIA, BOBONARO, HEADLINE, MUNISÍPIU

DSMA Bobonaro alerta labele konsumu na’an fahi mate ne’ebé kauza hosi moras

DSMA Bobonaro alerta labele konsumu na’an fahi mate ne’ebé kauza hosi moras

Fahi mate ne’ebé so’e iha mota-laran parte Trisula, Lospalos. Imajen/Tatoli.

BOBONARO, 28 setembru 2023 (TATOLI)- Atu prevene no kombate   virus African Swine Fever (ASF) transmite ba fahi, Diresaun Servisu Munisipál Agrikultura Munisípiu Bobonaro liuhosi Departamentu Pekuária no Veterinária, alerta ba komunidade hotu iha Bobonaro atu labele konsumu na’an fahi ne’ebé mate kauza hosi moras.

Xefe Departamentu Pekuáriaa no Veterinarias, Munisípiu Bobonaro, Eugenio Borges, konfirma durante ne’e fahi kontinua mate iha fatin-fatin tanba to’o agora seidauk iha ai-moruk no vasina ruma atu kontra virus ASF.

“Ita-nia fahi kuandu mate pasiénsia ba hakoi de’it ona, kuandu ita haan fali, justru habelar tán virus ne’e, tanba nia kutun ne’e belit iha ita-nia faru, nia fulan tolu mós la mate. Ezemplu ita ba lia ruma, ita kaer fahi moras, nia kutun belit iha faru, mai ita la fase no ita ba liu fahi luhan ne’e kona kedas,” nia informa ba jornalista sira iha Maliana, kinta ne’e.

Reponsável Derpartamentu Pekuáriaria no Veterinária ne’e subliña, atu preve virus ne’e maneira ida mak tenke fase beibeik fahi-luhan ho rinso ka molto kada loron.

Nune’e mós bandu ema foun labele hakbesik-aan ba fahi luhan no bainhira hakiak na’in kontaktu ho fahi iha kualkér fatin tenke fase roupa no hariis hotu, foin bele bá vizita.

Nia hatutan, medida preventiva ida-ne’ebé di’akliu mak hakiak-na’in sira tenke halo bio-seguransa ba fahi katak luhan iha ona halo tan lutu haleu.

“Atu nune’e nia labele halo kontaktu ho animál seluk, manu, asu, tanba manu lín-oan ne’e de’it mós nia bá tun iha fahi ruma mate nia leten, depois mai fali iha it- nia fahi luhan mós virus ne’e kaet ona, maibé kuandu ita halo bio-seguransa nia bele mate mós menus,” nia fó hanoin.

Enkuantu hafoin virus ne’e alastra mai Timor-Leste, parte Derpartamentu Pekuária no Veterinária Munisipiu Bobonaro halo kedas sosializasaun ba komunidade sira iha postu administrativu no suku kona-ba medidas preventivassira, tanba bazea peskiza nasionál hatudu 50 to’o 60% fahi iha Timor-Leste mak mate ona.

Notísia eelevante: Departamentu pekuária Bobonaro halo ona tratamentu ba animál 1,244

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!