iklan

BOBONARO, HEADLINE, MUNISÍPIU, SAÚDE

Departamentu pekuária Bobonaro halo ona tratamentu ba animál 1,244

Departamentu pekuária Bobonaro halo ona tratamentu ba animál 1,244

Xefe departamentu pekuária no veterinária, munisípiu Bobonaro, Eugénio Borges. Imajen Tatoli/Sérgio da Cruz.

BOBONARO, 26 Novembru 2022 (TATOLI)- Diresaun servisu munisipál agrikultura no peska iha munisípiu Bobonaro, liuhosi departamentu pekuária no veterinária halo ona tratamentu ba animál hamutuk 1,244 hahú hosi fulan-janeiru to’o novembru tinan 2022.

Notísia relevante: MAP vasina ona animál 53.985 iha Bobonaro

“Ami halo tratamentu ba animál hotu-hotu, hanesan karau, fahi, bibi, asu, manu hamutuk 2.244,” Xefe departamentu pekuária no veterinária iha munisípiu Bobonaro, Eugénio Borges, informa ba jornalista sira iha kna’ar-fatin, sesta ne’e.

Hosi tratamentu hirak-ne’e konsege gasta ona  ai-moruk hamutuk botir 166 kompostu hosi tipu antibiotiku botir 64, anti-parasita botir 38 no vitamina botir 64.

Tipu vasinasaun ne’ebé mak tékniku sira utiliza hodi vasina animál sira+ne’e mak hanesan ba fahi vasina marka kolera suína (hog cholera) doze ida bele vasina gahi 50, karau marka septicemia epizoótica doze ida bele vasina karau 50 no ba manu marka newcastle disease doze ida bele vasina manu 80 to’o 100.

“Ami tinan ida halo vasinasaun dala tolu ba animál sira+ne’ebé identifikadu, iha fulan-marsu ami halo vasinasaun manu 20,622 biku, iha fulan jullu 21,282, iha fulan-novembru 17,024 no karau hamutuk 2007,” nia fó-sai.

Nia hatutan, durante halo vasinasaun ba animál sira, tekniku  hasoru difikuldade oioin.

“Ezemplu hanesan manu, dadeer ita ba dader dehan manu sai tiha ona, entaun la konsege, sira dehan fali lokraik, depois lokraik ita ba fali dehan manu seidauk tama. Ida-ne’e mak halo ami defisil tebes atu vasina animál sira hanesan manu,” nia haktuir.

Maske hasoru difikuldade, Eugénio dehan obrigatóriu ekipa sira distribui de’it ai-moruk ba animál na’in sira mak halo vasina rasik tanba maioria hetan ona treinamentu kona-bá tékniku vasinasaun.

Enkuantu totál tékniku veterinária no pekuária hamutuk na’in-15 ne’ebé destaka iha postu administrativu Atabae na’in-ida, Balibo na’in-rua, Bobonaro na’in-rua, Lolotoe na’in-ida, Cailaco na’in-rua no restante iha postu administrativu Maliana.

Notisia relevante: MAP Bobonaro planeia kuda ai konservasaun 500 iha Leo-lima

Jornalista: Sérgio da Cruz

Editór:Evaristo Soares Martins

iklan
iklan

Leave a Reply

iklan
error: Content is protected !!