Edukasaun hahú implementa PKRE iha Baucau
BAUCAU, 28 setembru 2023 (TATOLI) – Grupu komunitariu hahú implementa Projetu Konstrusaun no Reabilitasaun Eskolár (PKRE) hamutuk eskola ualu iha munisípiu Baucau.
Diretór Serbisu Munisipál Edukasaun Baucau, Augosto Ornai Ximenes, esplika, loron-rua liu ba realiza enkontru ikus ho grupu komunitária hamutuk ualu ne’ebé implementa projetu refere hamutuk eskola ualu no projetu tolu seluk iha faze verifikasaun hosi Ajénsia Dezenvolvimentu Nasionál (ADN).
“PKRE faze daruak implementa ona, orsamentu aloka ona pursentu 25,” Diretór Serbisu Munisipál Edukasaun Baucau hateten iha Vila Nova, kinta ne’e.
Gupu implementadór sira hahú ohin kompra materiál fabrika no kontinua prepara kondisaun hanesan sobu eskola no sukat medida uma nune’e bele finaliza tuir durasaun tempu loron-120.
Projetu ualu ne’ebé hahú reabilitasaun no konstrusaun mak hanesan eskola pre-eskolár Haudere no Lebenei, postu Baguia, pre-eskolár Abulir no EBF Saraida, postu Quelicai.
Postu Baucau Vila hamutuk tolu komposta hosi pre-eskolár Buibau, EBF Katólika Uaimanu-boi, Eskola senkundária Baucau, postu Venilale mak pre-eskolár Bercoli.
Enkuantu projetu tolu seluk ne’ebé sei iha faze verifikasaun komposta hosi EBF Sarabata, ensinu jerál paraleru Laisorulai, postu Quelicai no Eskola eskondária filiál Aubaca, postu Baucau vila.
“Eskola tolu ne’e projetu komunitária hotu maibé sei halo verifikasaun, hein katak iha tempu besik bele implementa ona,” Augosto Ximenes akresenta.
Projetu hirak-ne’e hahú tarde tanba mudansa governesaun nunue’e posibilidade sei finaliza tarde, maske Ministériu Edukasaun orienta atu ezekuta iha restu tinan-ne’e maibé presiza tuir kondisaun grupu implementadór sira.
Augosto Ximenes, argumenta, ho implementasaun PKRE faze daruak ne’e seidauk bele rezolve hotu problema hotu maibé ajuda ona minimiza infraestrutura edukativa iha Baucau.
Hosi projeitu ualu ne’ebé hahú implementa uluk sei utiliza orsamentu hamutuk $696,189.76 ne’ebé sei konstrui foun no reabilita hanesan sala aula no eskritóriu profesór sira.
Notísia relevante: Grupu komunitária 11 hahú loke bankária ezekuta projetu PKRE iha Baucau
Jornalista : Natalino Belo
Editór : Evaristo Soares Martins
