DILI, 28 setembru 2023 (TATOLI) – Profesór 600 ne’ebé apoia atividade Programa HANDS (Halimar, Aprende no Deskobre Susesu) hetan avaliasaun husi Ministériu Edukasaun (ME) no ekipa husi programa refere kona-ba métodu hanorin dosente sira iha sala de aula.
Koordenadór Programa HANDS, Pedro Ximenes, avaliasaun ne’ebé ME halo ne’e tama iha programa estudu koñesimentu atitude prátika (KAP). Programa ne’e ekipa HANDS realiza atu akompaña profesór sira-nian koñesimentu, atitude no prátika kada loron iha aula.
“Ita realiza programa estudu ne’e tanba ita hakarak akompaña progresu profesór 600 ne’ebé durante ne’e apoia atividade HANDS ba labarik sira. Ita halo observasaun iha pré-eskolár ne’ebé kria ona fatin halimar ba labarik sira atu hatene profesór sira-nian kriatividade”, Pedro Ximenes dehan ba Tatoli iha Vila Verde, ohin.
Programa estudu ho modelu observasaun ne’ebé ekipa HANDS halo ba profesór iha munisípiu 12 inklui Rejiaun Administrativa Espesiál Oé-Cusse Ambenu (RAEOA) ho uza sistema grella ba observasaun katak iha ekipa ida kompostu husi profesór sira ne’ebé iha ona esperiénsia maka sei halo observasaun ba maneira hanorin ne’ebé dosente sira uza iha aula.
“Ita-nian ekipa sira bá iha sala de aula hodi observa lala’ok hanorin profesór sira-nian ba labarik sira, nune’e ita bele hatene ho didi’ak maneira ne’ebé sira uza hodi ensina labarik sira ne’e la’o tuir duni manuál ka la’e”, resposavel ne’e tenik.
Bainhira atividade observasaun ne’e maka identifika profesór sira hasoru duni difikuldade iha prosesu aprendizajen nia laran maka ekipa sei tau konsiderasaun hodi halo rekomendasaun ba ministériu hodi tau atensaun ba kestaun ne’e. “Karik profesór sira presiza tan ema espesializada ruma atu apoia sira ka presiza tan formasaun, ida ne’e maka tenke fó atensaun liután”, dehan.
Estudu ba KAP ne’e hahú iha maiu no sei finaliza iha dezembru. Nia rezultadu sei halo sosializasaun, iha janeiru tinan oin, ba fali profesór 600 refere, depois ba Ministériu Administrasaun Estatál, inklui parseiru sira, nune’e sira bele hatene didi’ak rezultadu refere.
Ba programa estudu ne’ebé maka realiza daudaun ne’e ho fundu rihun $75, maibé nia atividade ne’e bele gasta to’o rihun $100-resin.
Programa HANDS finansia husi Governu Nova Zelándia, liuhusi Banku Mundiál ho osan millaun $10-resin ba tinan 2021 to’o 2025.
Programa ne’e benefisia ona labarik besik rihun 30 iha ensinu pré-eskolár (EPE) hamutuk 400 iha territóriu. Primeira faze husi projetu ne’e implementa, entre 2015 no 2020, no kontinua estende ba tinan lima. Objetivu prinsipál husi programa ne’e mak oinsá atu tulun labarik sira bele halimar hodi aprende no bele deskobre buat ruma.
Notísia relevante: Labarik besik rihun 30 sai benefisiáriu ba Programa HANDS
Jornalista: Tomé Amado
Editora: Maria Auxiliadora
