Fernanda Lay: Governu presiza tau atensaun problema má nutrisaun ba labarik
DILI, 28 setembru 2023 (TATOLI)—Prezidente Parlamentu Nasionál, Maria Fernanda Lay, hateten Governu presiza tau atensaun ba problema má nutrisaun ba labarik sira iha Timor-Leste.
Notísia Relevante: PPN espera semináriu nasionál ‘garante protesaun labarik’ sei hamosu rekomendasaun
“Aat liu nutrisaun ba labarik sira, nune’e sira nia memória kakutak bele simu edukasaun di’ak liu,” Prezidente PN ne’e hateten bainhira hala’o abertura ba semináriu nasionál ho tema “Garante protesaun labarik no joven iha Timor-Leste” iha salaun OKA, kinta ne’e.
Nia hateten, Governu presiza tau atensaun hodi haree ba problema má nutrisaun ba labarik liuhosi alokasaun iha Orsamentu Jerál Estadu (OJE) 2024, tanba labarik sira mak futuru nasaun nian.
Reprezentante UNICEF iha Timor-Leste, Bilal Aurang Zeb Durani, hateten kestaun ba labarik sira iha Timor-Leste mak kona-ba mortabilidade ba labarik sira no má nutrisaun ne’ebé Timor-Leste aas tebes hanesan iha globalmente, entaun apoiu PN oinsá mak bele apoiu UNICEF entermu ministériu sira oinsá mak atu bele serbisu hamutuk kombate situasaun labarik nian.
Nia dehan, tuir estudu barak ne’ebé halo kona-ba taxa mortalidade labarik no má nutrisaun rejista ho númeru aas iha Ermera no Oé-Cusse ka RAEOA,
“Ho situasaun ne’e, ita bele halo mudansa hahalok inan sira-nian ne’ebé ita hatene iha 57%, ita inan sira laiha prátika hahalok di’ak entermu labarik sira moris mai, sira la fó susu-been inan nian ba labarik, nune’e hanesan fatór ida kontribui má nutrisaun no mortalidade labarik,” nia dehan.
Nune’e, Governu ho parseiru sira serbisu hamutuk atu kombate no Governu liuhosi Vise Primeiru Ministru ba Asuntu Sosiál, Mariano Asanami Sabino, loron hirak liu ba fó sai ona nia kompromisu atu estabelese steering committee ne’ebé serbisu foka ba estratéjia dezenvolvimentu labarik hodi responde ba problema labarik nian iha nasaun ne’e.
Iha parte seluk, UNICEF mós iha kompromisu kontinua apoiu dezenvolvimentu edukasaun iha nasaun ne’e liuliu ba labarik sira no hasa’e kualidade manorin no infraestrutura, nune’e serbisu hamutuk ho Ministériu Edukasaun (ME) atu bele garante kualidade aprendizajen ba labarik sira.
“Iha de’it númeru 27% ba ita-nia labarik iha Timor-Leste ne’ebé asesu ba iha eskola pre-eskolár, entaun hirak ne’ebé la asesu sira seidauk iha preparasaun ne’ebé mak di’ak tama iha prosesu aprendizajen ba iha eskola primáriu. Kualidade manorin sira no infraestrutura ne’ebé adekuadu ba labarik sira atu fasilita prosesu aprendizajen, entaun planu estratéjia ME nian ba tinan lima oin mai foka ba asuntu refere no UNICEF serbisu hamutuk nafatin ho Governu oinsá alkansa objetivu ida ne’e,” nia hateten.
Jornalista : Nelson de Sousa
Editór : Cancio Ximenes
