PNTL Covalima simu despaixu devolve komioneta hatama sasán ilegál ba na’in
COVALIMA, 28 setembru 2023 (TATOLI)–Komandu Polísia Nasionál Timor-Leste (PNTL) Covalima, simu ona despaixu hosi Ministériu Públiku (MP) atu devolve kamionete rua ne’ebé ekipa konjunta identifika hatama sasán ilegál liuhosi fronteira Mota -Masin, Tilomar, Covalima, ba karreta nia na’in.
Notísia Relevante: Ekipa konjunta identifika karreta Tronton rua hatama sasán illegal iha Mota-Masin
“Prosesu ita enkamiña ona ba Ministériu Públiku (MP) liuhosi delijénsia Ministériu Públiku (MP), koordena ho nia despaixu atu devolve kamioneta rua ba nia na’in,” Komandante PNTL, Munisípiu Covalima, Superintendente Polísia Calisto Gonzaga, hateten ba jornalista sira iha resintu salaun Canosa, kinta ne’e.
Atu devolve kamionete rua ba nia na’in, la’ós komandante munisípiu no investigasaun munisípiu mak devolve kamionete-rua, maibé titulár prosesu Ministériu Públiku (MP) mak fó despaixu hodi deside atu devolve kamioneta rua ba nia na’in.
“Kamionete rua ne’ebé devolve ba nia na’in iha semana kotuk, tanba nia despaixu iha ona ha’u nia meza,” nia dehan.
Evidénsia agora iha hela armajen MP ida-ne’e mak rai hein nia prosesu andamentu ba iha tribunál, maske devolve la signifika liberta só de’it atu bele entrega hafoin tribunál hakarak haree fizikamente komionete konserteza aprezenta.
Entertantu, iha sesta (15 setembru 2023) ne’e, ekipa konjunta identifika karreta Tronton rua hatama sasán ilegál hanesan karreta Tronton ho xapa mátrikula DH 8964 JB hosi Indonézia na’in ba kompañia hanesan CV Furak Ray Malaka, ema-ne’ebé simu Damoy Merigus Unipesoál Lda.
Tuir lista invoice hosi kompañia, Damoy Merigus Unipesoál Lda mak hanesan, Simente Tonasa saka 750, Kiko kaisa 800, Rundut kaixa 40, Noxone kaixa 15, roda li’ur motor IRC 275-17 hamutuk 40, roda li’ur kareta Swallow 550-13 hamutuk 30, Tanke Stainles 200 L hamutuk rua (2), Rabusadu Tamarin kaixa 200, Kopi Jahe kaixa 150 no Super Star Cokolate kaixa 15.
Ho nune’e, liuhosi ekipa konjunta halo inspesaun ba sasan ne’ebé kompañia hatama balun liu no balun la to’o tuir lista ne’ebé sosa sasán hanesan, simente falta saka 200, sasán kontra bandu hanesan importa plastiku karon 90, Kiko liu kaixa 241, Rundut liu kaixa 10, revusadu Tamarin kaixa 50 no Superr Star Chocolate kaixa lima (5).
Kareta Tronton ho xapa mátrikula E9160 AD hosi Indonézia CV As Trans kompañia ne’ebé simu iha Timor-Leste Linjes Lj2, Unipesoál Lda sasán ne’ebé iha lista kompra mak hanesan Simente Tonasa saka 500, Masin-Midar saka 100, besi ulir 13 MM 50 pises, Aqua mili litru 600 kaisa 500, Makanan ringang kaixa 200, Lesplan pises 150, Eko Mie kaixa 140, Mie Sedaap mutin kaixa 200, Top Capusino kaixa 200.
Sasán ne’ebé laiha lista kompra no kontra bandu mak hanesan bebida ho marka Sprite kaixa 251, Fanta kaixa 227, Kiko kaixa 200, Mie Sedaap kaixa 48, Eko Mie pak ida
Aleinde karreta Tronton rua hatama sasán ilegál laiha lista kompra no kontra bandu karreta Tronton rua mos halo modifikasaun hodi tula gozoel hamutuk litru 800 ne’ebé kada karreta Tronton gazoel ne’e litru 400.
Jornalista : Celestina Teles
Editór : Cancio Ximenes
