Ekipa konjunta identifika karreta Tronton rua hatama sasán illegal iha Mota-Masin

COVALIMA, 15 setembru 2023 (TATOLI)–Ekipa konjunta iha munisípiu Covalima identifika karreta Tronton rua hatama sasán ilegál hanesan sasán kontra bandu no laiha lista kompra iha pontu entrada fronteira Mota-Masin, postu administratrivu Tilomar, munisípiu Covalima.

Notísia Relevante:PNTL Covalima halo apreensaun ba sidadaun na’in-haat hatama sigaru ilegál

Ekipa konjunta ne’ebé lidera hosi Kámara Komérsiu Indústria Timor-Leste (CCI-TL, sigla portugés) Covalima ne’ebé kompostu hosi Autoridade Covalima, Komandu Polísia Nasionál Timor-Leste (PNTL), SERVER, Autoridade Tributária no Ministériu Komersiu no Indústria (MCIA).

“Tuir dekretu-lei númeru 3/2016 ne’ebé fó kompeténsia ba autoridade Covalima fó informasaun nune’e administradór Covalima orienta Diretór Servisu Munisipál Jestaun Merkadu no Turizmu, ami hosi ekipa konjunta halo inspesaun ba sasán importadu ne’ebé tama hosi fronteira Mota-Masin,” Diretór Servisu Munisipál Jestaun Merkadu no Turizmu, Vitorino do Carmo hamutuk ho ekipa fó sai hosi konferénsia ba imprensa, iha resintu Komandu PNTL Covalima, sesta ne’e,

Ekipa konjunta konsidera karreta Tronton rua hatama sasán ilegál sira hanesan kareta Tronton ho xapa mátrikula DH 8964 JB hosi indonézia nain ba kompañia hanesan CV. Furak Ray Malaka ema-ne’ebé simu Damoy Merigus Unipesoál, Lda.

Tuir lista invoice hosi kompañia Damoy Merigus Unipesoál, Lda, mak hanesan simente marka Tonasa saka 750, Kiko kaixa 800, Rundut kaixa 40, Noxone kaixa 15, Loda Liur motor IRC 275-17 hamutuk-40, roda li’ur karreta Swallow 550-13 hamutuk-30, Tanke Stainles 200 L hamutuk-rua (2), Rabusadu Tamarin kaixa-200, Kopi Jahe kaixa 150 no Super Star Cokolate kaixa 15.

Ho nune’e, liuhosi ekipa konjunta halo inspesaun sasán ne’ebé kompañia hatama balun liu no balun la to’o tuir lista ne’ebé sosa sasán hanesan sumentu falta saka 200, sasán kontra bandu hanesan importa plástiku karon 90, Kiko liu kaixa 241, Rundut liu kaixa 10, Rebusadu Tamarin kaixa 50 no Super Star Chocolate kaixa lima (5).

Kareta Tronton ho xapa mátrikula E9160 AD hosi Indonezia ne’e kompañia CV As Trans ne’ebé simu iha Timor-Leste Linjes Lj2 Unipesoál, Lda, sasán ne’ebé iha lista invoice hanesan simente Tonasa saka 500, Masin-Midar saka 100, Besi Ulir 13 MM 50 pises, Aqua mili litru 600 kaixa 500, makanan ringan kaixa 200, Lesplan pises 150, Ekomie kaixa 140, Mie Sedaap mutin kaixa 200 no Top Capusino kaixa 200.

Sasán ne’ebé laiha lista kompra no kontra bandu mak hanesan Sprite kaixa 251, Fanta kaixa 227, Kiko kaixa 200, Mie Sedaap kaixa 48, Ekomie falun ida (1).

Aleinde karreta Tronton rua hatama sasán ilegál laiha lista kompra no kontra bandu karreta Tronton rua mós halo modifika hodi tula gozoel hamutuk litru 800 ne’ebé kada Tronton gazoel litru 400.

Ekipa konjunta halo inspesaun hodi identifika sasán kompañia sira importa sasán kontra bandu, nune’e presijz parte kompetente halo investigasaun kle’an ba kompañia ne’ebé importa sasán hosi Indonézia no funsionáriu ne’ebé servisu fronteira no ema-ne’ebé simu sasán ilegál iha Timor-Leste.

“Ita haree sasán ne’ebé importa hosi Indonézia tama mai ho livre tanba sasán ne’ebé taka de’it terpal mós alfandega la identifika, signifika iha fronteira la halo pasa revista nune’e sasán livre tama iha fronteira,” nia dehan.

Vise Prezidente CCI-TL Asuntu Fronteira no Investimentu, Silveiro Cardoso da Costa, ekipa konjunta hala’o inspesaun konjunta, tanba hakarak salva emprezáriu lokál ne’ebé sai vítima ba importasaun sasán hosi Indonézia mai Timor-Leste.

“Ami CCI iha responsabilidade morál hakarak salva emprezáriu lokál ne’ebé sai vítima ba importasaun sasán hosi Indonézia mai Timor-Leste,” nia dehan.

Prezidente CCI Covalima, José do Rego Carvalho, hateten ekipa CCI Covalima halo intervensaun la’ós mesak maibé hamutuk ho ekipa konjunta ne’ebé identifika sasán ilegál hodi tama liuhosi dalan protokolu pontu entrada Mota Masin Salele.

“Ita haree agora karreta Tronton rua para hela ne’ebé hatama sasán ho dalan ilegál liuhosi pontu entrada fronteira Mota Masin,” nia hateten.

Ho nune’e, CCI Covalima rekomenda atu halo investigasaun kle’an nune’e labele hamosu tan hatama sasán ilegál liuhosi fronteira no CCI sei kontinua servisu nafatin halo inspesaun.

CCI halo inspesaun iha tinan barak ona ne’ebé akontese tanba sidadaun Indonézia tama ho vistu pasa porte turizmu hala’o negósiu, importadór indonezia faan direta la liu hosi agen.

Intensaun CCI Covalima halo inspesaun hakarak hatuur tuir regra no lei ne’ebé vigór ona, ho nune’e tenke la’o tanba durante emprezáriu lokál labele moris importadór hosi estranjeiru faan direta

Tuir planu, CCI Covalima sei hala’o enkontru bolu emprezáriu atu tuur hamutuk oinsá atu buka solusaun bazeia ba lei ne’ebé vigor, nune’e ema hotu kumpre lei no tuir lei komérsiu sai investór tenke iha kapitál $5000 iha konta bankaria, fó servisu ba ema na’in-50-resin no iha sertifikadu hosi trade invest maibé la realiza.

Komandante PNTL Munisípiu Covalima, Superintendente Calisto Gonzaga, hateten Kámara Komérsiu tenke hamutuk nune’e atu aprezenta tanba karreta tula sasán ne’ebé kontra bandu.

“Ita tenke halo buat ruma, CCI ho ita hamutuk prosesu no ita hamutuk ita aprezenta tula sasán kontra bandu ne’ebé karreta ita tahan, tanba kareta mak mobiliza sasán mai,” nia hateten.

Komandante mós dehan karreta Tronton mobiliza sasán hosi Indonézia mai iha Timor-Leste no mós modifika karreta hodi tula fali gazolina, nune’e nia orienta atu sobu sai.

Jornalista : Celestina Teles

Editór      : Cancio Ximenes