DTK-PNTL Kovalima instala sinál tránzitu iha merkadu Tua Derek
KOVALIMA, 04 Outubru 2026 (TATOLI) – Diresaun Transporte no Komunikasaun (DTK), Munisípiu Kovalima, instala ona kuadru sinál tránzitu, iha Merkadu Tua Derek ne’ebé lokaliza iha Suku Kamansa, Postu Administrativu Suai atu organiza movimentu veikulu no hamenus engarrafamentu iha área merkadu.
“Kuadru sinál tránzitu ne’ebé mak ami instala iha parte karuk no parte loos ho kada parte kuadru rua atu ajuda motorista sira komprende regra estasionamentu iha merkadu, nune’e hodi fasilita movimentu transporte publiku no evita engarrafamentu iha merkadu”, Diretór DTK Munisípiu Kovalima, Joaquim Gusmão informa ba jornalista sira iha Bairru Kosta.
Dirijente ne’e esplika katak hafoin instalasaun ramata autoridade sira fó avizu ona ba komunidade iha loron Sesta no Sábadu. Durante fulan ida, DNTT sei servisu hamutuk PNTL liuhusi Autoridade Tránzitu no Jestaun Merkadu atu kontrola no orienta motorista sira kumpre.
“Husu motorista no kondutór sira atu respeita sinál tránzitu ne’ebé instala ona, hodi mantein orden no seguransa movimentu veíkulu iha Merkadu Tua Derek, ne’ebé lokaliza iha Suku Camanasa, Postu Administrativu Suai Vila, Munisípiu Kovalima,” nia afirma.
Iha Sorin seluk, Abitante Joana Amaral apresia servisu husi Diresaun Transporte no Komunikasaun instala sinál tránzitu hodi redús engarrafamentu iha merkadu.
“Ha’u apresia tebes servisu husi Diresaun Transporte Terestre Munísipiu Kovalima instala sinál tránzitu hodi redús engarrafamentu iha merkadu tanba durante sinál tránzitu laiha hamosu engarrafamentu bainhira iha loron merkadu ne’ebé monu iha loron sábadu”, nia apresia.
Notisia relevante: PNTL-DNTT instala sinál tránzintu iha área engarrafamentu
Jornalista: Celestina Teles
Editór: Florencio Miranda Ximenes
