VIQUEQUE, 28 setembru 2023 (TATOLI)—Komandante Eskuadra Polísia Nasionál Timor-Leste (PNTL) postu Viqueque Vila, munisípiu Viqueque, Inspetór Asistente Polísia, Venseslau Moreira de Oliveira Freitas, hateten, membru ne’ebé iha Eskuadra la sufisiente atu koloka iha sentru votasaun eleisaun suku.
“Membru Polísia iha Eskuadra Viqueque hamutuk na’in-19, tanba ne’e difísil atu kontrola fatin eleisaun iha aldeia 62 hosi suku 10. Ha’u husu ba parte Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés), bainhira realiza eleisaun maka koloka membru Polísia iha kada aldeia, ha’u sente membru la to’o, nune’e ha’u prefere se bele órgaun sira bele deside eleisaun iha suku konsetra iha fatin ida no rua, atu nune’e ami bele kontrola ho di’ak eleisaun suku,” Venseslau Moreira, hateten, iha abertura edukasaun sívika, iha sede suku Caraubalu, kinta ne’e.
Biban ne’e, nia husu atu entidade hotu bele kolabora hamutuk ho autoridade seguransa hodi kria pás iha eleisaun komunitária.
“Eleisaun dala-rua maka ita liu ona, hanesan eleisaun prezidensiál, parlamentár no daudaun ita prepara ba eleisaun komunitária atu hili líder suku hodi halo dezenvolvimentu iha suku, tanba ne’e parte seguransa husu apoiu sidadaun sira inklui arte-marsiál sira atu kolarabora ho autoridade seguransa hodi asegura eleisaun komunitária iha loron 28 outubru 2023 la’o ho susesu,” nia akresenta.
Notísia relevante : CNE fó edukasaun sívika ba eleitór-sira iha Viqueque
Inspetór Asistente Polísia konsidera, eleisaun komunitária fó liberdade ba sidadaun sira hotu hodi partisipa, tanba ne’e sidadaun sira ka grupu balun labele ameasa ba malu.
“Importante ne’e Viqueque tenke la’o ba oin, tanba ne’e husu ita hotu ninia kontribuisaun, iha eleisaun rua liubá ne’e la’o ho di’ak maski problema iha maibé ita konsege halo atuasaun ho di’ak. Ha’u husu mós ba xefe suku, xefe aldeia no konsellu suku sira atu hamutuk oinsá atu eleisaun bele la’o hakmatek, nune’e tempu eleisaun bandu abitante sira labele hemu tua tanba hemu tua sei mosu problema iha loron eleisaun,” nia akresenta.
Iha fatin hanesan, Diretór Nasionál Edukasaun Sívika Partidu Polítiku Dokumentasaun no Informátika hosi CNE, Carlos Alves Lopes, hateten, kona-ba kolokasaun sentru votasaun iha aldeia depende ba koordenasaun.
“Sira deside PNTL sira bele kontrola fasil. Kona-ba sentru votasaun ne’e koloka iha kada aldeia ida-idak iha suku, maibé tuir rekomendasaun PNTL katak aldeia sira besik malu se bele tau hamutuk, ida-ne’e depende ba ita-nia kolaborasaun entre autoridade lokál, órgaun eleitorál no sira atu ita-nia Polísia sira bele kontrola di’ak,” nia tenik.
Atividade edukasaun sívika ne’e hetan partisipasaun hosi autoridade lokál, estudante no eleitór sira hosi suku Uma-Uain Kraik, Caraubalu no Uma Ki’ik hamutuk ema na’in-120 resin.
Jornalista : Vitorino Lopes da Costa
Editora : Julia Chatarina
