DILI, 28 setembru 2023 (TATOLI) – Profesór kontratadu hamutuk 1.416 simu ona sira-nian remunerasaun husi Ministériu Edukasaun ba fulan ualu nian ho totál orsamentu hamutuk millaun $2,6.
Ministra Edukasaun, Dulce de Jesus, hatete pagamentu refere realiza ona iha semana ida ne’e ba manorin sira ne’ebé asina ona kontratu iha 2023, maibé iha lubuk ida maka seidauk hetan sira-nian direitu tanba sei problema hela ho sira-nian dokumentu.
“Profesór lubuk ida maka to’o agora seidauk simu sira-nian saláriu tanba seidauk hatama lista prezensa. Profesór balun nian estatutu seidauk sai sidadaun Timor-Leste, sira ne’e balun mai husi rai seluk, maibé sira mós hetan kontratu husi ministériu”, governante ne’e hatete iha JL Villa, ohin.
Iha sorin seluk, Diretora-Jerál Administrasaun no Finansa, Cecília Belo Assis, realsa katak sei iha profesór 68 maka nia dokumentu iha hela prosesu verifikasaun no na’in-15 maka hetan ona kontratu, maibé bá serbisu fali iha fatin seluk.
“Ita-nian profesór 1.416 ne’e hetan ona sira-nian pagamentu sura husi janeiru mai to’o agostu 2023. Sira-nian saláriu simu la hanesan. Balun fulan ida simu saláriu retroativu $204 , seluk fali simu $272”, adianta.
Ba profesór 68 ne’ebé sei iha prosesu verifikasaun dokumentu bainhira loos ona maka sira bele simu ona retroativu no ba manorin 15 ne’ebé serbisu fali iha fatin seluk ne’e konsidera lakon ona sira-nian direitu.
Profesora kontratada, Cesária Marques Cabral, ne’ebé hanorin iha Eskola Bázika Sentrál Farol admite katak nia hetan ona pagamentu retroativu husi janeiru to’o agostu.
Saláriu ne’ebé nia hetan ne’e kada fulan $272 bazeia ba grau akadémiku. Profesora língua portugeza ne’e simu retroativu diferente tanba nia mai ho nivel akadémiku lisensiatura.
Rekorde katak porta-vós profesór kontratadu, Amália Rodrigues Ximenes, liuhusi konferénsia imprensa ne’ebé realiza foin lalais ne’e iha Jardín 05 de Maio, husu ba Ministériu Edukasaun atu aselera pagamentu saláriu, tanba besik fulan sia seidauk simu direitu mezmu halo ona devér nu’udar manorin iha eskola.
Notísia relevante: Ministériu Edukasaun deside loke konkursu foun ba profesór kontratadu sira iha 2024
Jornalista: Tomé Amado
Editora: Maria Auxiliadora
