MALIANA, 29 setembru 2023 (TATOLI)-Autoridade Munisipál Bobonaro (AMB), lideradu Ernesto de Oliveira Barreto, sei hasai sirkulár hodi muda negosiante sira-ne’ebé okupa espasu públiku hodi fa’an sasán.
Enkuantu autoridade munisípiu Bobonaro foti medida ne’e hodi kumpre Polítiku IX Governu Konstitusionál liuhosi Sekretaria Estadu Asuntu Toponímia no Organizasaun Urbana bazea ba Lei númeru 33/2008 kona-ba ijiene orden públika.
Notísia relevante: Negosiante Maliana husu tetu didi’ak bazár movel iha merkadu Mau-Mali no Soso
Ernesto de Oliveira Barreto observa katak negosiante sira-ne’ebé okupa espasu públiku sira mak hanesan iha merkadu sentrál kapitál Maliana, merkadu Balibó, Bobonaro Vila no merkadu lokál Ili-Bole.
“Ida-ne’ebé mak okupa espasu públiku, iha tempu badak sei hasees hotu, ha’u haree ita-nia merkadu Maliana laran, trotoar leten ema mak nakonu, ne’e ami sei koordena ho Komandante Polísia atu haree buat sira-ne’e hotu,” nia informa ba Jornalista sira, iha Maliana, sesta ne’e
Prezidente Autoridade Munisipál ne’e fó ona orientasaun ba administradór postu sira atu halo aprosimasaun uluk ho negosiante sira nune’e bele fó biban molok halo intervensaun.
“Ita-nia espasu públiku tenke livre, se la livre aban bainrua buat ruma, komandante polísia eskuadra no administradór tenke toma responsablidade,” nia fó hanoin.
Tanba ba futuru sei muda negosiante sira iha merkadu Maliana ba fali merkadu Mau-Mali iha suku Ritabou.
“Agora ita pasiénsia lai, tanba agora sei fura bee, tinan oin foin halo moru ba merkadu Mau-Mali, hotu ona mak foin hare fatin ba negosiante sira,” nia katak.
Alende ne’e sei halo mós operasaun ba animál sira-ne’ebé movimenta livre iha fatin públiku sira hanesan, merkadu, eskola no seluktán.
Maibé Ernesto haklaken molok halo operasaun sei aviza dala tolu ba komunidade sira atu sulan idak-idak nia animál.
“Ita fó avizu ne’e dala tolu, hasai sirkulár karik dala tolu, se liu hakarak ka lakohi tenke halo operadaun, tanba nasaun ba oin, la’ós ba kotuk,” nia afirma.
Kestaun okupa espasu públiku, negosiante merkadu Maliana, Bendita Moniz, prontu koopera hodi hamaluk fatin.
“Ami kiik ne’e la’o-tuir de’it, maibé mak ne’e buka fatin di’ak ba ami, atu ami fa’an mós bele hetan oinsá, sé atu muda fali ami ba merkadu Mau-Mali, boot sira mós tenke hanoin, ami ba ne’e ema iha ka lae, ema mai sosa ami-nia sasán ka lae, ida ne’e de’it, se lae ami la ba ida,” negosiante ne’e fó hanoin ba Autoridade Bobonaro.
Notísia relevante: Vise PPN preokupa merkadu rua iha Maliana abandona
Jornalista: Sérgio da Cruz
Editór: Evaristo Soares Martins
