VIQUEQUE, 29 setembru 2023 (TATOLI)—Konstrusaun Uma Naroman Povu (UNP) unidade lima iha suku Maluru, postu Administrativu Viqueque Vila, munisípiu Viqueque, daudaun ne’e paradu desde fulan-jullu.
“Kona-ba konstrusaun UNP ba abitante suku Maluru hamutuk unidade 10, maibé iha uma lima maka kontrusaun fíziku besik finaliza ona no uma lima daudaun paradu hela tanba badaen sira halo koneksaun eletrisidade hosi ai-rin, maibé la fó hatene ba parte Eletricidade de Timor Leste, Empreza Públika (EDTL, E.P) Viqueque. Ho nune’e, ekipa téknika sira hetan iha fulan-jullu tesi kotu tiha liña eletrisidade. Ho ida-ne’e, uma lima ne’e daudaun sai paradu hela,” Xefe suku Maluru, Francisco Amaral, relata iha sede suku, sesta ne’e.
Notísia relevante : PNDS Viqueque menus forsa traballu kontrola programa
Uma lima ne’ebé paradu partense ba aldeia Macalosa, ho ninia progresu atinje ona 45%, maibé daudaun badaen sira seidauk kontinua serbisu tanba laiha liña eletrisidade, enkuantu konstrusaun uma lima iha aldeia Loho-oan atinje ona 60%.
“Daudaun ne’e ha’u halo planu hodi ba koordena ho diretór Programa Nasionál Dezenvolvimentu Suku (PNDS) munisípiu Viqueque hodi komunika ba EDTL, E.P hodi dada filafali ahi eletrisidade atubele finaliza konstrusaun,” nia akresenta.
Autoridade suku dehan, parte responsável tenke haree tanba konstrusaun uma ne’e ba maluk kbiit laek sira.
“Ha’u hanoin parte EDTL mós bele tau-matan ba konstrusaun UNP ne’e tanba uma ne’ebé atu harii ba ita-nia maluk kbiit laek sira. Ita hotu tenke tau-matan hamutuk hodi kria kondisaun ba sira,” nia hato’o.
Konstrusaun UNP unidade 10 kompostu hosi kuartu tolu ho dapur tipu normál no Plus B, ho kustu millaun $1
Iha fatin ketak, Koordenadór EDTL, E.P Viqueque, Ermesto Sarmento, haktuir, hahú inísiu monta kontadór pre-pagu, kada uma iha Macalosa hetan pulsa eletrisidade $2.
“Hafoin sira liga ilegál durante fulan-neen. Ho nune’e, ekipa téknika sira identifika hetan hodi tesi kotu. Maibé, parte EDTL munisípiu Viqueque informa ona prosedimentu ba autoridade sira, bainhira fó hatene fali maka tékniku sira ba fornese filafali ahi,” nia tenik.
Tuir observasaun Agência Tatoli iha terrenu, nota katak daudaun ne’e uma lima kalen taka hotu ona no balun reboka ona. Ekipa téknika tesi fiu liga hosi ai-rin ne’ebé liga ba uma lima, nune’e badaen sira labele halo serbisu tanba laiha liña eletrisidade.
Prosesu konstrusaun UNP unidade 10 ne’e hahú iha loron 17 dezembru 2022, ho durasaun serbisu fulan-tolu.
Jornalista : Vitorino Lopes da Costa
Editora : Julia Chatarina
