Membru PN kontinua husu MJ rezolve problema pasaporte

DILI, 28 setembru 2023 (TATOLI)—Membru Parlamentu Nasionál (PN), sesta ne’e, liuhosi Xefe Bankada CNRT, Deputadu Duarte Nunes, kontinua husu Ministériu Justisa (MJ) atu rezolve problema pasaporte.
Notísia Relevante: Deputadu Luis Roberto husu IX Governu solusiona kaderneta pasaporte
“Horikalan ha’u haree Primeiru-Ministru ko’alia. Hanoin iha tempu badak ne’e Governu mak hatene. Presiza ne’e mak, se besik ne’e iha, ita bele hola,” nia hateten ba Agência Tatoli iha uma fukun PN, sesta ne’e.
Antes ne’e, Komisaun F trata asuntu Saúde, Seguransa Sosiál no Igualidade Jéneru iha Parlamentu Nasional (PN), halo audiénsia urjente ho Ministériu Saúde (MS) hodi solusiona problema pasaporte ba pasiente hamutuk na’in-50 hodi transfere ba rai-li’ur halo tratamentu saúde.
“Objetivu ohin, ami audiénsia ho Ministra Saúde ho nia vise na’in-rua ko’alia problema pasaporte ba pasiente atu transfere ba rai-li’ur, ne’ebé iha pasiente 40 inklui ho pasiente veteranu na’in-10, hamutuk pasiente 50,” Prezidente Komisaun F, Deputada Maria Gorumalli Barreto, hateten ba jornalista sira iha uma fukun PN.
Preokupasaun ne’e komisaun simu hosi pasiente no família pasiente sira presiza solusiona, tanba pasiente sira-ne’e labele hala’o tratamentu iha rai-laran, liuliu sira-ne’ebé mak ho moras kankru, kardiolójia, fase raan no moras rins.
Pasiente sira nia dokumentu pasaporte eletróniku ne’ebé mak sei bele prosesu hela sai problema boot ba pasiente sira-ne’ebé atu haruka ba rai-li’ur, pasiente no família pasiente balun laiha pasaporte no balun laiha dokumentu hanesan billete identidade, kartaun eleitorál ho sertidaun RDTL, nune’e presiza prepara ninia dokumentu hotu bainhira atu bele hetan pasaporte.
Ministra Saúde presiza halo liña koordenasaun ho Ministéiru Negósiu Estranjeiru no Kooperasaun (MNEK) no Minitériu Justisa (MJ) hodi buka solusaun.
Nia hateten, Ministra Saúde, Élia A.A. dos Reis Amaral, labele prosesa buat sira-ne’e tanba problema pasaporte ne’ebé agora daudaun Timor-Leste enfrenta, maibé sei haree didi’ak junta médiku ne’ebé iha.
Deputadu Fretilin, David Dias Mandati, mós husu Governu rezolve lalais problema pasaporte, liuliu ba pasiente sira-ne’ebé moras atu transfere ba rai-li’ur, aleinde problema pasaporte ne’e difikulta tebes traballadór no estudante sira-ne’ebé atu trata pasaporte ba rai-li’ur.
Jornalista : Nelson de Sousa
Editór : Cancio Ximenes

