DILI, 30 setembru 2023 (TATOLI)—Governu Reinu Unidu liuhosi Ministra Estadu Reinu Unidu ba Indo-Pasífiku, Anne-Marie Trevelyan, apoia millaun $1 ba Ministériu Saúde (MS) atu kombate má-nutrisaun iha Timor-Leste.
Iha biban hanesan, Ministra Saúde, Élia dos Reis Amaral, Ministra Anne-Marie, no Reprezentante United Nations Children’s Fund (UNICEF) iha Timor-Leste, Billal Durhani, halo lansamentu ba ‘intervensaun nutrisionál komunitária atu prevene no halo tratamentu ba labarik idade menus hosi tinan-lima ne’ebé sofre krekas’.
Ministra Anne-Marie, hateten, Governu Reinu Unidu fó apoia tanba tau importánsia ba saúde iha Timor-Leste, nune’e ho orsamentu ne’e espera bele fó asisténsia adisionál.
“Agradese bele vizita Timor-Leste no haree besik liu problema saúde, liu-liu oinsá bele apoia kombate má nutrisaun. Timor-Leste iha progresu signifikativu tebes iha área saúde, ba redusaun mortalidade, hasa’e atendimentu servisu no treinamentu médiku ba profisionál saúde sira. Apresia katak má nutrisaun ba labarik sira sai hanesan obstákulu ba Governu ne’e no iha kompromisu forte atu responde ba ida-ne’e,” Ministra deban iha salaun Palácio das Cinzas, Caicoli, sábadu ne’e.
Notísia relevante : Fernanda Lay: Governu presiza tau atensaun problema má nutrisaun ba labarik
Nia rekoñese, problema má-nutrisaun ne’e sei sai signifikante tebes ba Timor-Leste, nune’e ezekutivu sira iha kompromisu estabelese sistema saúde forte no akompaña nafatin mudansa seguransa saúde globál.
Fundu ne’ebé atribui sei permite apoia inan sira iha munisípiu no bele halo tratamentu ba má nutrisaun.
Iha fatin hanesan, Reprezentante UNICEF iha Timor-Leste, Billal Durhani, konsidera, intervensaun iha komunidade importante atu mobiliza família no komunidade komprieende problema má nutrisaun.
“Liuhosi estrutura komunidade nian hanesan grupu apoia inan bele indentifika labarik sira ne’ebé sofre má nutrisaun atubele transfere sira ba fasilidade saúde halo tratamentu,” Billal Durhani tenik.
Nune’e mós, Ministra Saúde, Élia dos Reis Amaral, agradese ba Governu Reinu Unidu nia apoiu orsamentu ba ministériu atu trata problema má nutrisaun, atu nune’e bele serbisu hamutuk liuhosi UNICEF.
“Má nutrisaun hanesan labarik sira ne’ebé mak tinan-lima mai kraik hetan krekas maran, oinsá ita atu hadi’a fíziku labarik sira, ho nune’e apoia ida-ne’e bele hadi’a di’ak liután má nutrisaun iha futuru,” nia tenik.
Jornalista : Felicidade Ximenes
Editora : Julia Chatarina
