DILI, 30 setembru 2023 (TATOLI)—Boxista Profisionál hosi Filipina, Manny Pacquiao, ramata ona nia vizita durante loron-tolu iha Timor-Leste no molok husik nasaun ne’e, nia rai hela novidade di’ak.
“Iha Timor-Leste ha’u hakarak ajuda dezenvolve iha modalidade desportiva hanesan futeból, basketból no espesiál liu ba boxe, ida-ne’e mak objetivu importante ha’u mai iha ne’e hodi haree direita. Vizita ida-ne’e la’ós ikus ona, maibé ha’u sei mai fali Timor-Leste iha futuru oin mai,” Manny Pacquiao, hateten molok hiit ain hosi Timor-Leste, iha edifísiu Ministériu Juventude Desportu Arte no Kultura (MJDAK), Bidau Lecidere, sábadu ne’e.
Nune’e, nia agradese ba líder no povu Timor-Leste hotu ne’ebé simu nia ho di’ak durante nia estadia.
Notísia relevante : Manny Pacquiao planeia promove Boxista Timor-Leste
Iha fatin hanesan, Ministru Juventude Desportu Arte no Kultura, Nélio Isaac Sarmento, agradese ba Manny Pacquiao ne’ebé hatan ona konvite hodi mai vizita ona Timor-Leste no promete atu dezenvolve desportu.
“Lori Governu no Estadu Timor-Leste nia naran, hakarak hato’o agradese ba Manny Pacquiao ne’ebé mak mai vizita ona. Vizita ida-ne’e importante tebes ba ami, la’ós de’it atu hametin ita-nia relasaun, maibé motiva mós ami-nia boxista sira hotu. Fila bá Filipina karik keta haluha Timor-Leste,” Ministru Nélio dehan.
Manny Pacquiao to’o Dili ho aviaun komersiál Citilik iha loron 28 setembru liubá no ohin fila hikas ona bá nia nasaun orijen Filipina ho aviaun hanesan, ne’ebé partilla iha tuku 13:00 otl.
Durante loron-tolu estadia iha Dili, Pacquiao konsege vizita Prezidente Repúblika, Primeiru-Ministru, instituisaun Estadu balun no klube boxe tolu hanesan Benfica, Dili Boxe no El-Matador.
Aleinde ne’e, komunidade Filipina no timor-oan entusiazmu hasai fotografia ho boxista nível internasionál ne’e hodi rai hela hanesan rekordasaun no partilla iha rede sosiál. Seluk lori sira-nia kamizola hodi fó Pacquiao asina.
Jornalista : Hortencio Sanchez
Editora : Julia Chatarina
