DILI, 30 setembru 2023 (TATOLI)—Prezidente Repúblika (PR), José Ramos Horta, akompaña ho ekipa, sábadu ne’e, simu vizita ofisiál hosi Ministru Estadu ba asuntu Negósiu Estranjeiru Repúblika Índia, Rajkumar Ranjan Signh, hamutuk ho delegasaun, iha Palásiu Prezidensiál, Bairru Pité.
Biban ne’e, parte rua diskute relasaun bilaterál hodi estabelese embaixada iha país rua.
“Tuir esplikasaun Primeiru-Ministru Índia iha Jakarta, bainhira asiste konferénsia nível a’as ASEAN, Índia hakarak estabelese embaixada no Timor-Leste mós hakarak estabelese embaixada iha Índia,” PR Horta hateten ba jornalista sira hafoin sorumutuk.
Notísia relevante : Índia hakarak apoia Timor-Leste dezenvolve sistema identifikasaun úniku
Nune’e, PR Horta sujere Primeiru-Ministru, Kay Rala Xanana Gusmão, hamutuk ho Ministériu Negósiu Estranjeiru no Kooperasaun (MNEK) atu estabelese reprezentasaun Estadu iha Índia iha tinan 2024, maibé depende hosi orsamentu.
“Índia hanesan país importante iha Ázia no Inglaterra, iha dezenvolvimentu di’ak iha setór informátika, agrikultura, produtu médiku, mina-rai no gás. Estadu Índia prontu kolabora ho Timor-Leste atubele apoia iha setór hotu, liu-liu iha espesialista médiku atu estuda iha ne’ebá no formasaun IT inklui área agrikultura tanba Índia nia esperiénsia barak liu,” Horta akresenta.
Aleinde ne’e, Índia mós hakarak apoia Timor-Leste atu sai membru plenu ASEAN no prontu kolabora.
Iha biban hanesan, Ministru Estadu Índia, Rajkumar Ranjan Singh, hateten, hasoru malu ne’e hodi ko’alia ba futuru relasaun entre país rua.
Jornalista : Nelson de Sousa
Editora : Julia Chatarina
